State Health Care Scheme ami tur ADB-in la tifel lo
State Health Care Scheme
ami tur ADB-in la tifel lo
State Health Care Scheme tih changtlunna atana hman tur Asian Development Bank-a cheng vaibelchhe 1000 sum puk tum chu ADB lam hian a la ti fel lo.
New Delhi-a cham mek Health minister Dr R Lalthangliana chuan Nilaini khan ADB hotute kawmin sawrkar laipuiin an pawmpui tawh Mizoram State Health Care Scheme tihchangtlunna tur vaibelchhe 1000 chu a ranglama tifel turin a ngen a. ADB hotute hian theihtawp an chhuah thu leh concept note pawh an buatsaih mek tih an lo hrilh.
Ministry of Home Affairs hnuaia Department of Border Management secretary Atal Dulloo kawmin Kawrpuichhuah Integrated Check Post (ICP) tihpuitlinna tur a sum ruahman tawh cheng vaibelchhe 552 chu central cabinet pawmpui tura chhawp chhuak thuai turin a nawr a. India leh Myanmar insumdawn tawnna hmunpui Land Custom Station Zokhawthar leh Zorinpui, sawrkar laipuiin a lo pawm tawh atana detailed project report (DPR) siam chu a rang thei ang bera buaipui turin a ngen. Union secretary hian kar hnih kalta vel chiaha a hna thar hi a la chelh avangin a la thar deuh tih minister hi lo hrilhin, a lo zirchian tur thu leh a theih anga ranga bawhzui a tum a sawi.
Union MoS for HRD Dr Raj Kumar Ranjan Singh pawh tlawhin Mizorama Kendriya Vidyalaya Sangathan engemawzat din dilna a thehlut a, rang taka ngaihtuah zui sak turin a ngen.
Border Roads Organization director general Rajeev Chaudhary kawmin Lunglei leh Lawngtlai district inkalpawhna atana pawimawh Tuipui ‘D’ Darzo kai lei dawhna tur cheng vaibelchhe 91 chuang saction tawh chu a sawipui a. DG hian a tul angte an buaipui fel tawh thu leh thuneitu sang lamah an thlen mek thu hrilhin, August kar hmasa ber ralhma in engkim an tihfel theih a inrin thu a lo hrilh.
Thingsai – Pangkhua inkalpawhna defence road BRO hoin an laih mek chu km. 21.38 hmabak a la awm tih a thlen chu national highway single lane angin an chhunzawm tur thu leh hemi atan hian Ministry of Defence chuan cheng vaibelchhe 111 a ruahman tawh thu lo sawiin, thla 6 chhungin DPR peihfel tum a nih thu leh working season tharah hna thawh tan hman tumin an inruahman tih a lo sawi a ni.
Commerce minister Dr R Lalthangliana hian Ministry of Micro, Small & Medium Enterprises (M/o MSME) tlawhin MSME secretary thar SCL Das a kawm a, Mizorama MSME tihchangtlunna tur leh tihhmasawnna tur project hrang hrang an thehluh tawhte a umzui thu a hrilh. Union secretary hian a hna thar a zawmna a la rei loh thu a lo sawi a, a hnuaia officer-te kokhawm nghalin an sawiho a, a chak thei ang bera hma lak chhunzawm an tum thu in a lo chhang.