Ngaihsak loh vangin Tuivai HP dinna tur phalna hnukkir – ZPM

Kawlphetha mega watt 210 siam theihna Tuivai Hydel Project dinna tur sawrkar laipuiin a thuphunga a remtih tawh, state sawrkara a buaipuitu turten an ngaihsak loh avanga hnuhkir leh a nih chhan chu sawifiah turin MNF party an phut tih ZPM chuan an sawi.
ZPM Gen. Hqrs. hminga thuthar thehdarhtute an kawmnaah Dr Vanlalthlana chuan Mizoramin hydro electric power MW 4000 vel siam chhuah theihna kan neih laiin Assembly Session-a zawhna chhanna atanga an hmuh chu, state mamawh 7% chauh kan la siam a. Hydel project kan neih ho lah kan enkawl theih loh avangin company kutah kan dah a ngai tih a sawi. MW 80 siam theihna Bairabi HP a zuzi te, MW 60 siam theihna Tuirial HP to taka kan lei tak dan leh MW 210 siam theihna Tuivai HP zuzi leh ta te pawi an tih thu a sawi.
“Ministry of Finance-in Viability Gap Funding hmanga cheng vaibelchhe 1700 senna tur Tuivai Hydel Project, 210 MW atana ‘in-principle approval’ a pek tawh chu, a buaipuitu turin a ngaihsak loh leh hun pek belh a dil loh avanga an phalna hnuhkir a ni a, MNF party hian mipui hmaah thil dik tak sawiin, a chhan sawifiah turin kan phut a ni,” a ti.
Mizoram budget sum tam tak eizotu power kan leina kan tih tlem theih chuan, nasa takin kan sum indaihlohna a tiziawm thei dawn a. ZPM a sawrkar chuan power-a kan intodelh theih dan tur buaipui chu an ngaipawimawh hmasa dawn tih a sawi a ni.
ZPM corporator Baryl Vanneihsangi chuan an party-in Sustainable Development and Reform Policy a duan hmangin state intodelh, corruption nekchepna leh mi taimate dinchhuahna ram an siam thei tih a sawi a. Lirtheia eizawngte chu accident tawk thei, lirthei khu kara eizawng an nih avangin ngaihsak ngai an ti a. ‘Labour cess’ hmanga hamthatna an dawn ve theih loh avangin an hamthatna tura sum mamawh chu VAT on POL atangin emaw Consolidated Fund atangin emaw a pek theih a. An harsatna hrang hrang chu an association hruaitute nen inberemin chinfel dan ngaihtuah sak an tum tih a sawi.
Bana Kaih Policy hmangin thil thar chuaktu/ siam chhuaktu/ thiamthil hmanga eizawng leh market thlunzawm dan tur an ngaihven anga, market nena an thlunzawm hunah chuan anmahnia kaltirin, state dang sumdawngte nena an insumdawn tawn dawnah bum an nih lohna turin an contract/ inremna an enpui chauh dawn tih a sawi.
“Sum lama harsatna an tawh thin kha sutkian dan tur ngaihtuah a ni anga, sawrkarin subsidized rate leh loan pung awm mang lo pawhin a pui zui ang. Sum tam tham an mamawha loan an lak duh pawhin an tan sawrkar chu guarantor-ah a tang ang,” a ti.