Ngaizel leh Hlimem khama lung tla tih ziaawm dan rel

Ngaizel leh Hlimem khama lung tla tih ziaawm dan rel
Ngaizel leh Hlimen kham atanga lungtla thin tih ziaawm dan ngaihtuahin CSIR-CIMFR (Council of Scientific and Industrial- Central Institute of Mining and Fuel Research) chief scientist Dr C Sawmliana hoin Aizawl District Disaster Management Authority (DDMA) puipate nen thutkhawm a ni.
Good Friday hmang tura Mizorama lo haw Dr C Sawmliana hi Indian School of Mines Dhanbad-a engineering a zirpui thin Aizawl bawrhsap Er Lalhriatpuia sawmna angin a hoa helai kham lung tla thin tih reh dan hi ngaihtuah a ni a. Leilung lama mithiam Mizoram University associate professor Dr Laldinpuia leh Pachhunga College University asst. professor Dr Remruatfela ten powerpoint presentation hmangin Ngaihzel leh Hlimen kham leh a leilung an lo zir tawhna an entir a, a inven dan leh tih nep dan an sawi bawk.
Mithiamte chuan real time landslide early warning system chu a rang lama Ngaizel leh Hlimen bakah Aizawl Municipal huamchhunga lei min awm thinna hmunah dah theih nise, tiin an rawt a ni.
Helai khama lung tla tih reh dana rawtna a neihte Dr C Sawmliana hian a sawi a. Mizorama mithiamte nen tanghoin hetiang lama expert company-te detail project report siamtir a, anmahni thawhtir nghal a tha tih sawi a ni. Permanent solution nei tur chuan sum sen a sang dawn a, DPR fel tak nen sawrkar laipui lama thehluh thuai chu a kawng hmang ber nia an hriat thu an sawi bawk.
Mizorama mithiamten research an lo neih tawhna data chu tha a tih chief scienctist hian sawiin, a la tangkai hle dawn tih a sawi. Landslide early warning system hi cheng nuai 13 vel sengin 50 vel lei theih rin a ni a. Disaster Management & Rehabilitation directorate chu lei dan kawng dap turin an ngen a ni.