Ngawrh takin Vairengte-Sairang kawng siamthat mek a ni – PWD
Ngawrh takin Vairengte-Sairang
kawng siamthat mek a ni – PWD
Vairengte leh Sairang inkar kawngpui, National Highway 54 chu January 20 atang khan ngawrh takin siamthat hna an kalpui a. Hei hian kawng khuar hnawh leh tuiluankawr chhia siamthat pawh a huam tih Mizoram PWD chuan an sawi.
PWD thuchhuak chuan, siamthat hna thawk hian labour 20 chu Khamranga Mega Food Park-ah riaklutin, labour camp dang pawh Khamrang- Selesih peng bulah siam zawh tawh a ni tih a sawi a. Khamrang thlen hma, Tuitun lei bul leh Rengtekawn area-ah hna hi thawh tan niin, heng hna thawhna atan hian excavator, vibratory roller leh tipper chu a hmunah dah tel a ni tih a sawi.
Vairengte to Sairang kawng (NH54) chu Ministry of Road Transport & Highways-in NHIDCL enkawl turin gazette-ah chhuah tawh mah se, PWD-in project kal mek pahnih – Bilkhawthlir to Kolasib leh Kawnpui to Khamrang a la chang a, a bak chu NHIDCL kutah a hlan tawh tih sawiin, ‘Kawng pahnih inkar hi nikum lam khan NHIDCL kuta hlan tura project thawh zawh tawh a ni chungin, Khamrang to Kawnpui bik hi contractor-in maintenance a tih that theih loh avangin contract tih tawpsak a lo ni tawh a. Helai kawng tha lo thawmthatna atan hian MoRTH chuan Mizoram sawrkar kutah maintenance fund pe thei tawh lo mah se, Mizoram sawrkar chuan fur chhunga tha taka lirthei an tlan leh theihnan cheng nuai 75 chu WBM pothole repair-na atan a lo sanction tawh a, thawmthat hna a thawk mek a ni,’ a ti.
He thil hi high level meeting-ah pawh sawiho tawh niin, NHIDCL chuan heng kawng hi 2024 December thla tawp/ 2025 January thla tir lama an kuta la fel (takeover) tur angin insawi mah se, an remchang leh ta lo niin thuchhuah hian a sawi a. PWD tan enkawl chhunzawmna tur sum sanction MoRTH atanga dil chhuah theih a nih tak loh avang leh NHIDCL chu sanction thar dil theitu zawk an nih tawh avangin NHIDCL kuta hlan fel (handover) tum a ni, tiin, maintenance pawh NHIDCL tih chhunzawm tur ni mah se, an remchan leh tak loh avang hian PWD chuan kawng khuar hnawhna tur sum sanction chu sawrkarah dil leh mekin, hemi hmachhuan hian hma an la nghal tih a sawi a ni.