Nghasih lui chhehvel thianfai
World Water Day 2023 denchhena hmalakna kal zelah Inrinni khan Lungleiah Nghasih lui thenfai hnatlangpui neih a ni.
He hmalakna hi North East Initiative Development Agency (NEIDA), UD&PA, PHED, Project Save Tlawng, Clean Lunglei, KTP Lunglei Venglai Branch, YMA Sub Hqrs Lunglei leh YMA Ramthar Branch tangho ruahman niin, mi 100 chuang an thawkchhuak.
District Sanitation Task Force Lunglei chairman, bawrhsap Ramdinliani pawh tel ve in, sawrkar department leh tlawmngai pawlte thahnemngaihnaa Nghasih lui thenfai hnatlanga pen chhuak zawng zawngte chungah lawmthu a sawi. “Lunglei khawpuiin lui kan neih pawimawh ber zing ami, kan tui tlan ber Tlawng lui fintu Nghasih lui kam leh a chhehvelah bawlhhlawh chitin reng a tam em em hi a veiawm takzet a. Faina leh thianghlimna kawngah hmasawnna tur kan la ngah hle a ni,” a ti.
Hnatlanga thawkchhuakte hi group thumah inthendarhin, lui dung leh a chhehvel an thianfai a ni.
Inrinni vek khan Mizoram Baptist Kohhran naupang pawl, KNP ITI Unit chuan environmental awareness campaign atan ITI Veng huamchhunga Lawibual lui (LAD Picnic Spot thin chhehvel), Chite fintu chu ASEP nen tangdunin an thianfai a, luite dung km.1 dawn vela plastic hnawm leh thildang, garbage bag lian 30 chuang an chharkhawm.
Nghasih lui chhehvel thianfai
Get real time updates directly on you device, subscribe now.