NHIDCL leh DC te telin NGT hnena khinah vau

National highway kawng siam hna thawk mektuten environment venhim kawnga an ngenna an tih hlawhtlin loh zel chuan kawng siamtu mai ni lo, district thuneitute thlengin National Green Tribunal-a khin an tum thu environment humhalhtu pawl pakhat chuan an sawi.
Centre for Environment & Social Justice chuan Champhai leh Khawzawl bawrhsap-te hnenah a hrang ve vea ziaka thlenin, National Highway and Infrastructure Development Corporation Limited (NHIDCL) kawng laih mek, NH-06 (Seling – Champhai) ah environment dan pakhatmah zawm a nilo tih, state Environment Forest & Climate Change department-a RTI dan hmanga an zawhna chhannaah tarlan a ni tih a sawi.
2020 June 10-a Mizoram EF&CC department-in hriattirna a tihchhuahah, NHIDCL-in Champhai leh Khawzawl district-a hna a thawh mekah environment dan zawng zawng a bawhchhia tih a sawinaa, District Monitoring Committee (DMC) chairman an nihna angin, heng district bawrhsap pahnih hian, dan loa environment tihchhiatna nasa tak thleng mekah an tih tur an hlen lo hle nia an hriat thu hrilhin, environment der dep tak tihchhiatna thleng mek leh la thleng zel thei tur vil tura ruat DMC hian tuna atang chuan an koa mawhphurhna nghah hi an hlen an phut, tih a thlen.
‘Kan ram ngeiah ram leilung fate zahna chhete mah nei loa, kan environment tihchhiatna nasa tak thleng leh, environment dan zawm a nih loh avang hian NHIDCL kawng laih mek hi karkhat chhunga stay order pek kan phut a; kan phut anga stay order hi pek a nih loh chuan, National Green Tribunal (NGT) ah complain kan siam dawn,’ tiin, bawrhsap pahnih chu district magistrate an nih angin, an district enkawl huamchhunga NHIDCL project lian tak kal mekah hian nasa taka environment dan palzutna a awm reng chung pawha action lak nghalna an hmu lo a nih chuanm he hna thawktute, district thuneitute leh environment dan kengkawhtu zawng zawngte pawh NGT-a khin tel an tum tih a hrilh a ni.
District bawrhsap pahnih hnena lehkha a pek hi 2023 Narch 2 thleng hmalakna a awm leh awm loh an nghak dawn tih Centre for Environment & Social Justice hian a sawi a ni.