NHM hnuai ami dahngheh tum

NHM hnuai ami dahngheh tum
National Health Mission hnuaia thawkte chu Mizoram sawrkarin Govt. of Mizoram Regularisation of Centrally Sponsored Scheme (CSS) Employees Scheme 2024’ anga regularize zel tum an ni tih Health minister Lalrinpuii chuan a sawi.
Assembly Session-a zawhna chhangin Health & Family Welfare minister chuan, NHM hnuaia regularisation kalpui turah inthliarna a awm loa, DP&AR-in dan a siam anga a phut ang apiang chu an lut zel a, Health department-ah health worker 31 an lut tawh a, dah ngheh tura buaipui mek an nei a, engemawzat an lut leh dawn tih a sawi a ni.
Primary health centre (PHC) a doctor awm lohnaah Zoram Medical College atanga zirchhuakte an dah a, an ni hian zir zawm leh an duh avangin an bansan leh pheuh pheuh a, doctor awm lohna PHC hi 8 vel chu a nih leh ngei tawh a ring tih a sawi.
Health worker 100 lak turah advertisement chhuahin, exam mai tura an inbuatsaih laiin, CSS woker-ten court-ah an khin avangin a khawtlai leh ta a, court-a thubuai tihfel a nih veleh an la thei thuai dawn tih a sawi a ni.
An department-ah thawktu indaihlohna a nasa a, Group ‘D’ pawh 300 chuangin an indaih loa, a semrual hna thawkin PHC-ah 3, CHC-ah a lun deuh leh damdawi in sak mek an nih loh chuan 4 an dah tih a sawi. Health worker pawh an semrual a, clinic leh sub centre a awl deuh pawtkhawmin health worker awm lohna 100 velah 89 an hnawh khat a, chuti pawh chuan health worker awm lohna an la nei nual a, tuna 100 an lak thar hunah chuan an indaih tawh an beisei tih a sawi a ni.