Ni 100 inhlawhnaah Aadhar neilote inhlawh thei dawn lo

Sawrkar laipuiin miretheite tana inhlawhna a siam thin, ‘ni 100 inhlawhna’ tia hriat MGNREGA (Mahatma Gandhi National Rural Employment Guarantee Act) hnuaiah Aadhar card neilote chu inhlawhna pek ve theih an ni lo thuai dawn.
Sawrkar laipui Ministry of Rural Development hotute dawra New Delhi-a kal Mizoram RD minister Lalruatkima hnena an lo sawi danin, ni 100 inhlawhna kalphungah Aadhar card neilote chu inhlawhna an pe ve thei tawh dawn loa, he kalphung hmang tur hian ministry lamin a ranglamin hma an rawn la dawn tih an lo hrilh a ni.
Mizoram RD minister hian Ministry of RD hnuaia Rural Housing changtu deputy director general (RH) Gaya Prasad chu a pisa ah hmuin Mizoramin a mamawh mirethei leh harsa zawkte tana in sak tanpuina (rural housing) chungchanga harsatna tam tak state-in a tawhte a sawipui a. DDG hian tun kar chhungin Mizoram tan cheng vaibelchhe 60 pekchhuah a nih tur thu a lo hrilh.
Ministry of RD-a MGNREGA(s) joint secretary Amit Kataria pawh hmu in, Mizoram chu ni 100 inhlawhnaa an tih that thu leh India ram state lian tak takte tan pawh entawntlak a nih zia a lo sawi a. RD minister thu thlen Mizoram mamawh chu tun karah tih ngei a tum thu a lo hrilh. Mizoram chu tehna (perimeter) hrang hranga India ram state te zingah a titha ber pawl a nih avangin state-in a mamawh ang tih sak thuai thuai a phurawm tih lo sawiin, hmalam hunah pawh inthlahrung loa mamawhte a bula thlen zel turin a chah.
RD minister hian joint secretary hi State Assembly inthlan hma ngeia Mizoram tlawh turin a sawm a. Joint secretary hian zin ngei a tum thu a hrilh. Hemi piahlamah hian Azadi Ka Amrit Mahotsav hnuaia hmalakna Amrit Sarovar Mission-ah Mizoram chuan hna a thawh that avangin, tun Independence Day hman turah pawh hian RD department hnuaia official pali chu sawmbikah rawn neiin, Delhi-a Independence Day hmannaah an tel dawn tih a lo sawi a ni.