Ni 122 chhung hri vei hriat chhuah awm tawh lo

Covid-19-in Mizoram a chenchilh tawh a, hri vei hriat thar pawh an awm leh thin. Nikumah pawh a darh leh deuh a, mahse a nasa zui lo. Tun hnaiah a zia a, ni 122 chhung chu hri vei hriat thar an awm tawh lo.
Integrated Disease Surveillance Programme (IDSP) chhinchhiah danin, nikum September ni 16-ah khan hri vei hriatchhuah pakhat a awm a, chumi hnuah chuan vanneihthlak takin hriat thar an awm rih lo. September ni 16-a hriatchhuah hi September ni 22-ah a chhuak a, chumi hnuah chuan covid lakah Mizoram a fihlim ta rih.
2025-ah khan May ni 30-ah hri vei thar an awm leh a, chumi hmaa hri vei hriatchhuah hnuhnun ber chu 2024 October thlaa mi a ni. Thla ruk chuang Mizoram a him hnuah 2025 May-ah an awm leh a, chumi hnu chuan nasa vak lovin a darh leh.
Nikumah India ram hmun thenkhatah kum laihawlah Covid-19 a darh leh a, Mizoram pawhin India sorkar thu angin a do hna a hma aia ngawrhin a thawk leh. Mahse vanneihthlak takin a nasa zui lo.
IDSP-in an chhinchhiah danin, nikum khan Mizoramah mi 40-in Covid-19 an vei a, na tak an awm lo. Natna dang vanga enkawl, enfiahna lamah covid an lo vei tih hriatchhuah an ni fur a, an chhungte’n an vei avanga enfiah, chuta tanga hriatchhuah pahnih khat an awm bawk.
2024-ah khan hri vei hriatchhuah mi 73 an awm a, 2024 hnuah hian hri hi a nasa vak tawh lo niin a lang.
Mithiamte chuan Covid-19 hian Mizoram a awmchilh tawh avangin hri vei hriatchhuah thar an awm thin turah ngaih a nih thu an sawi a, khawvel ram dangte dinhmun pawh chutiang tho chu a nih thu an sawi.
IDSP chhinchhiah danin, Mizoramah hri vei hriatchhuah mi 2,39,675 an awm tawh a, an zingah hian mi 2,38,941 chu damin an chhuak. Vanduaithlak takin mi 734-in nunna an chan.