Ni 14 chhung hri vanga enkawl awm lo tawh

August thla tir lamah Covid-19 vei zat a pung hluai a, mahse vanneihthlak takin a pung zui rih lo. Tun hnai ni 14 chhung chu hri vanga enkawl pawh an awm tawh lo.
Integrated Disease Surveillance Programme (IDSP) chhinchhiahnaa a lan danin, August ni 11 khan Covid-19 vei mi 11-te chu damin an chhuak a, tihian tun hnaia hri vei hriatchhuahte an chhuak kim. Hemi hnu hian hri vei hriatchhuah thar an awm rih lo.
Ni 11 hnuah hian mi 31 endik an ni leh tawh a, ni 12-ah mi 14, ni 13-ah mi pariat, ni 14-ah mi panga, ni 15-ah mi pali endik an ni. An vai hian hri an vei lo vek.
Covid-19 hi May atang khan Mizoramin a hre leh tan a, August thla tir lamah hri vei zat hi a pung. Ni 1-ah khan mi pakua endik an ni a, hri an lo vei vek. Ni 5-ah mi 10 endik an ni leh a, hri an vei vek. Ni 8-ah hri vei hriatchhuah thar pakhat a awm leh a, chumi hnuah hri vei hriatchhuah an awm ta rih lo.
August thlaah hian hri vei hriatchhuah mi 20 an awm tawh a, hei hi a hma thlate ngaihtuah chuan a tam. IDSP chhinchhiah danin, May-ah khan hri vei hriat thah mi pahnih an awm a, June-ah mi pali, July-ah mi 13 an awm. August thla tirah a pung hluai a, mahse a pung zui rih lo hlauh.
IDSP hotute chuan hri veite hi na tak an ni ngai lo a, natna dang vanga enkawl, fimkhur thua endik, chuta tanga Covid-19 an vei tih hriatchhuah an ni tlangpui tih an sawi. An chhungteah hri vei an awm avanga endik, chuta tanga hriatchhuah pahnih khat an awm bawk tih pawh an sawi.