Ni 15 treasury a kal thei tawh lo – Leader of opposition

Sum enkawl thiamloa MNF sawrkar puhtute sawrkarna hnuaiah ni 15 chhung treasury a kal thei tawh lo niin leader of opposition Lalchhandama Ralte chuan a sawi.
MNF office Mizo Hnam Runa Thawhtannia inkhawmah MNF adviser ni bawk Lalchhandama Ralte chuan MNF sawrkar sum puk sawisel nasa em emtute chuan an sawrkar atanga ni 50 pawh a liam hmain cheng vaibelchhe 80 an puk nghal a. Sum enkawl thiamloa puhtute hnuaiah ni 15 lai treasury a kal thei tawh lo niin a sawi. “Bureaucrats leh intellectual-te an mangang ru hle a. Tha bik leh fel bik nia inzuarten ni 50 erhawrh min hruai hnu hian kuthnathawktute pawh an mangang ta hle,” a ti.
Mizoram Subordinate Services Selection Board thiah tumna a awm chu pawi a tih thu a sawi a. Result chhuak tur engemaw zat a awm bakah dan ang thlapa advertisement chhuak tawh, form fill up tawh cheng nuai 17 chuang lut tawhte chu sawrkar tharin engtia hmalak zui nge a tum, tih zawtin; MPSC-ah a hlanchhawng dawn nge tih a zawt a ni.
“SEDP sum chhungkaw 60000 chuang hnena a thleng ta lote kha a pawi a. Cheng vaibelchhe 40 health care atana dah tur an tih leh, cheng vbch. 110 kuthnathawktute tana price support atana dah tura an sawi pawh cheng khat mah an la dah lo hi a mak a ni,” Lalchhandama Ralte hian a ti.
SEDP hnuaia thawktute sawrkarin a chhawr zui zel lawmawm a tih rualin, an kal zel dan tur leh engtin nge hma an lak zui dawn tih School Education minister hlui hian a zawt a. “Chhungkaw sangtel hlauthawng leh mangangin an awm mek a, an hmalam hun ngaihtuahin an indawmkun mek. Hengho chungah hian sawrkar hian ngilneihna lantir hram rawh se,” a ti. Sawrkar thar pian hnua health clinic tawp ta leh Education department bikah hmalakna pawimawhte chhunzawm hram se a duh tih a sawi bawk.