Ni 19 chhung ruah sur ta

June ni 8-ah khan ruah a sur a, chumi hnu chuan ni tin a la sur. A sur loh ni a la awm lo.
Ruah sur hun a ni bawk a, tunlaiin Mizoramah ruah a tla tha hle; ni 19 chhung chu ni tin a la sur, June ni 8 atanga ni 26 chhung khan ruah sur loh ni a awm lo.
June thla tir atangin ruah hi a sur a; State Meteorological Centre chhinchhiahnaa a lan danin, ni 1 atanga ni 4 thleng khan ni tin a sur a, ni 5-ah a chawl. Ni 6-ah a sur leh a, ni 7-ah a sur lo leh. Ni 8-ah a sur leh a, chumi hnu chuan ni tin a la sur. Tun thlaah ni 5-ah leh ni 7-ahte chauh ruah hi a sur lo.
Amaherawhchu, ruah hi ni tin a sur na a, a tam zawkah chuan ruah hi a tam lo; a tehnaa teh tham ngawr ngawr chauh a nih chang a awm fo. Tun hnaiah pawh ruah hi a tam lo, ni 21-ah mm 2.6 a tla, ni 22-ah phei chuan mm 0.4 lek. Ni 23-ah mm 4.4, ni 24-ah mm 2.2 a tla. Ruah tui mm 5 tling lo hi chu tlem te tak tak a ni a, mm 10 hnuai lam pawh hi tam han tih tur a ni lo.
June ni 15-ah khan mm 72.6 a tla a, ni 11-ah mm 33 a tla. Heng hi a tam ni a ni a, mm 72.6 te hi chu tam tham tak a ni.
State Meteorological Centre-in India Meteorological Department atanga khawchin thlirlawkna an dawnah chuan tun hnai ni sarih chhungin ruah hi a la sur ang tih a ni a, mahse tam thama sur tura ngaih chu a ni lo.