Ni 22 chhung hri vei hriat thar awm tawh lo

Covid-19 hri vei hriat thar an awm ve deuh reng tawh a, mahse hrileng tia sawi tur khawp chu a ni lo. Tun hnaiah phei chuan hriat thar an awm rih lo vang vang tawh a, ni 22 chhung chu Mizoramah hri vei hriat thar an awm lo tawh.
September ni 16 khan hri vei hriat thar pakhat a awm a, ani hi a hnuhnung ber a ni rih. Ni 24-ah damin a chhuak a, September ni 24 hnuah Mizoramah hri vei an awm rih lo.
Integrated Disease Surveillance Programme (IDSP) chhinchhiah danin, kuminah Mizoramah mi 40-in Covid-19 an vei tawh a, vanneihthlak takin ngaihtuahawm khawpa na an awm lo.
Nikum khan September-ah mi pathumin hri an vei a, kumin September-ah pakhatin a vei. Nikum khan kum tluanin 73-in hri an vei tih hriatchhuah a ni a, kuminah October ni 8 thlengin hri vei hriat chhuah mi 40 an awm tawh.
Nikum khan June velah hri vei an pung tan a, August-ah a vanglai a thleng. Kuminah pawh chutiang bawk chuan thil a kal a, June-ah mi paliin hri an vei tih hriat chhuah niin, July-ah mi 13-in, August-ah mi 40-in an vei tih hriatchhuah a ni. Nikum June-ah khan mi pakuain an vei a, July-ah mi 10-in, August-ah mi 44-in an vei.
Sample endik a awm ve deuh reng a, Thawhlehni-ah pawh mi panga endik niin, Thawhtanni-ah mi pali endik an ni. Vanneihthlak takin hri an vei lo vek.
IDSP te chhinchhiah danin, Mizoramah mi 2,39,675-in Covid-19 hi an vei tawh a, mi 734-in he hri vang hian nunna an chan tawh.