Ni li chhungin hri vei thar awm lo

May leh June velah Covid-19 hri a hluar leh a, mahse
vanneihthlak takin tun thlaah a zia. Tun hnai ni li chhungin Mizoramah hri vei hriatchhuah thar a awm IDSP lo.
IDSP te’n an chhinchhiah danin, July ni 13-ah khan hri vei hriat thar pakhat a awm a, chumi hnuah hriat thar an awm rih lo.
Hri vei thar an awm loh bakah a veite pawh an dam zel a, July ni 17 khan hri vei enkawl lai pakhat a awm.
Tun thlaah hian vanneihthlak takin hri vei hriat thar zat a tam rih lo a, July ni 17 thleng khan mi 12-in an vei tih hriatchhuah a ni. Thla hmasa lam nena khaikhin chuan hrileng hi a zia rih hle. IDSP te’n an chhinchhiah danin, May-ah khan Mizoramah mi 375-in hri an vei a, June-ah mi 116-in. June thlaah hian a tlahniam tih a tawh a, mahse mi 116 an la tling. July-ah a tlahniam ta hle.
Covid-19 hi kumin kum tir lamah a zia a, January-ah hri vei an awm lo. February-ah pawh an awm lo vang vang a, ni 28-ah pakhat a awm. March leh April-ah an awm pheuh pheuh a, May-ah a hluar ta a ni.
July ni 17 thleng khan Mizoramah sample 3,747 endik a ni tawh a, mi 591-in hri an vei tawh. Vanduaithlak takin kumin mi pariatin Covid-19 vangin nunna an chan tawh.