By Familia Fanai Laltansanga
-- Advertisement --
American space agency, NASA chuan Instagram-ah Nî thlalak thar a tichhuak a, khawvel mite ngaihven a hlawh hle a, he thu ziah lai hian mi 1,297,181 laiin an ‘like’ tawh a. He thlalak hi The Solar Dynamic Observatory (SDO) lak a ni.
Ni khi kum billion 4.5 aia upa a ni a, khawvela engkima engkim, nunna nei zawng zawng nunna hnar a ni. Kan chenna khawvel atanga km maktaduai 150-a hla atangin Solar system-a planet zawng zawng nghahchhan nei lo va, a vir ngaia vir reng tura hip khawmtu a ni. Thil reng reng hi relative concept vek a ni a, a hla, a hnai kan tihte pawh hi kan awmna azir leh kan tehna azir vek a ni a.
Ni khi a heltu planet te nen solar system anga kan ngaihtuah chuan a dinna ngaiah a ding reng a, Milky Way galaxy chhunga thil awm ang zawnga kan ngaihtuah chuan Nî pawh khi chak lutuk tak mai, second khata km 251-a chakin Milky way laimu a lo hel tho mai.
Ni khi kan chenna khawvel ai hian a let 109-in a lian a ni a, a rih zawng hi khawvel ai hian a let 330,000- in a rit a, a sakhatna hi Hydrogen 73% vel leh helium 25% vel a ni a, oxygen, carbon, neon leh iron tlem tlem a awm tel bawk.
Ni-ah khian second khat apiangin hydrogen kg maktaduai 600,000 chu helium-ah a inlet but but reng a. Chu chu Atomb bomb aia nasa taka chak, hydrogen bomb a puak nawn awn awn reng ang a ni a.
Chutiang taka Ni chhunga nuclear puak nen khaikhin ralah chuan kum 1945 August thla ni 6-a Atomb bomb an thlak tak “Little Boy”, Hiroshima khawpui vawilehkhata vaivuta chantirtu kha chu meisi ang lek a ni ang. Ni chhungril satzia hi sawi thiam a har a, rawhtuina mei hi ni kawchhung satzia nen khaikhin ralah chuan vur anga vawt a ni ang. Ni-a hydrogen fusion avanga êng leh lum rawn inphuhchhuah ur ur chu khawvela thil nung zawng zawng tan nunna hnâr a lo ni ta a ni.
Ni atanga êng lo phit hi minute 8 leh second 18-ah khawvel a lo thleng a, khawvel atanga ni hlat zawng hi 1 au ˜ 1.496×108 km@ km mtd 149.6 a ni. Lei atanga Thla hlat zawng km 384,400 nena khaikhin ralah chuan a hla ve deuh det.
Ni a han dek dawn!
Kum 2018 August ni 12 chawhnu dar 1 chiah khan America ram Florida state, Cape Canaveral Air Force Station-a Launch Complex 37 atangin ni thleng rawka han thlawk thleng tur Parker Solar Probe chu United Launch Alliance Delta IV Heavy rocket chuan hlawhtling takin a kap chhuak ta a. Ka ngaihtuahna chu he Parker Solar Probe thlawh chhoh rual hian van sangah mupui angin a thlawk chho deng deng ta mai a. Darkar khat-ah km 690,000-a chakin a phit chho va.
‘Seeing is believing’. Hmuh chuan awi loh theih a ni lo.
Sakhua hi chu rinna a ni a, rinthu leh ngaidan sawi tam a ngai hle a ni mai thei a. Science-ah chuan finfiah theih a nih loh chuan thu dik leh thutaka pawm theih a ni lo.
Khawvel tuamtu boruak hi atmosphere an ti a. Ni-a mei alh zuai zuai anga a pawn langa meialh awmna khi corona (Latin, ‘crown’) an ti a. He Parker Solar Probe hi beisei anga a thlawh tluan chuan kum 2024-ah ni chhungril hual veltu Corona chhungah khian a han tlawk lut dawn a, a thil zirchian atang hian mihringin ni chanchin dik a hriat belh theih beisei a ni.
Ni khian êng (light) leh lum(heat) chauh a phuh chhuak lo va, êng zungzam (radiation) chi hrang hrang bakah thirhipthei chakna zungzam lam (magnetic field) chak namen lo tak a phuh chhuak ur ur reng bawk a. Mau hmun vahchap ro tang tha tak han hal a, lo kang meialh a in vaw hlup hlup a, a rum hum hum ang hian Ni-a meialh (nuclear fusion) khi a invaw hlup hlup reng a, meialh thlipui chak namen lo, second khata km 500-a chak (darkar khata km maktaduai khata chak) a tleh hum hum reng bawk a. Chung a thil rawn phuahchhuah chuan khawvel leh vanthengrenga thil awm tam tak chungah nghawng a nei ta a ni.
Ni chhungrila a lum zawng hi 15 million degree Celsius vela sá ni tura ngaih a ni a, tuna an thil kah chhuah hi ni chhungril hualtu Corona thleng a han thlawk lut dawn a. Ni chhunga liluh tura an siam hi inches 4½ chhaha siam carbon-composite solar shield, a sat zawng 2,500 degrees Fahrenheit@ 1371.11111 degrees Celsius tuar zo tura siamin an khuh a ni. Tin, tuna an kahchhuah tak Parker hi mihring thil siam azawnga thlawk chak ber a ni dawn a, khawvel tuamtu boruak (atmosphere) a sut tlang hnu chuan vansangah darkar khatah km 690,000-a chakin a phit chho dawn a ni.
Van khi
Kum 1990 April ni 4 khan America rama van sang chanchin zir bing pawl, United Space agency NASA leh European Space Agency tangkawp chuan van thengreng chanchin zir chiang tura a bik taka an siam The Hubble Space Telescope chu lei tuamtu boruak chungah khian an han kap chho a. Chhum hliah theih loh leh lei tuamtu boruak (atmosphere) hliah phak loh chin, lei atanga km 569-ah khian a awm ta reng a.
Chu van tukverh, Hubble Space Telescope in kum 30 chhunga a thlalakte chuan khawvela mihringte ngaihtuahna leh van chanchin an lo rin dan a her danglam ta bawih bawih mai a. A lo mak a ni, van khi! Hubble Space Telescope hi mihring thil siamah chuan van sang chanchin zir chianna hmanraw pawimawh ber a lo ni ta a ni. Kum 2011 December ni 6 khan Hubble thil hmuhchhuah atang hian scientist mi tam takin research paper 10,000 an ziak tawh a ni. Chuvangin Hubble hi khawvel mithiamte mit tivartu a ni kan ti thei ang.
Van zauzia leh khawvel lo tetzia hi engtin nge ka khaikhin tak ang le! Ka chung a va pik tak em!
Hubble thlalakte hi hla phuah thiam R.K.Kamlala Thlarau Entlang inlarna a hmuh ang mai mai kha a lo ni lo tawp mai. Sichangneiin thawhthua Entheia ai mah khan a hmu thui theiin a hmuh fiah thei zawk fê a ni. Arsi tama tamzia hi Mizo tawngin sawifiah ngaihna ka hre hlawl lo. Arsi hi an lo dam reng bik lo va. Arsi thi tur chalchang tal natzia leh puak rapthlakzia chu namen lo tak a ni.
Amah hmangaih Johanan, “Chûng chu ziak fai vek ni dâwn sela, lehkhabu ziak tur zawng zawng chu khawvelah pawh hian lengin ka ring lo,” a tih ang kha a ni a, chawlhkar tin tak meuh Hubble thlalak rawn thawn hi 120 gigabytes a ni a, lehkhabuah siamin rem dawn ila, kar khat chhunga a thlalak rawn thawn ringawt pawh hi feet 3,600-a chhah a ni ang. Kum 30 chhunga a thlalak rawn thawn zozai tam turzia chu han ngaihtuah ve mai teh.
Awih la, awih suh la (Believe it or not), Hubble thil hmuhchhuah chanchin langsar zual tal ka han ziak hram ang e.
Kum 2013: Hubble chuan Comet ISON (simeikhu pakhat hming) a thlir reng a, a thlithlai reng laiin Arsi dang pakhat bulah a puak keh dur mai a. Hmun hla lutuk tak mai arsi thi puak a hmu bawk. Ni heltu zinga Neptune-ah khian a heltu thla ang a thar pakhat a hmuh chhuah belh leh bawk a. Van thengrenga a maka maka tam galaxy zinga galaxy 400 vel a thlur bing deuh va, chûng thlalak atang chuan kan chenna khawvel leh ni te awm khawmna Milky Way Galaxy chanchin, thuthlung hlui ti mai ang, hmanlai chanchin a zir chiang ta a ni.
Kum 2014: Asteroid P/2013R3 a thlir reng a, arsi lian thi tur puak, supernova SN2014J a hmu bawk. Hlate khua tih aia hla daih zawka “Comic magnifying glass” an tih mai a hmu a, a thlalak a rawn thawn a. A thlalak rawn thawn hi a hmingah “Ultraviolet Coverage of the Hubble Ultra Deep Field” an vuah. Lei leh van lo pian chhuah dan chhuidawn nan an hmang tangkai hle dawn a ni.
Kum 2015: Van thengreng hla lutuk tih piah lam rama chhum ang maia arsi awm khawm “Pillars of Creation” ‘Pathian thilsiam thawmmawl te’ tih thla fiah tawkin a la. Chu bakah Andromeda Galaxy thla a la a, van sang hla ber thlalak 3-D in a siam thei a. Ni heltu Neptune-a awm dark voltex an tih a en thlithlai reng bawk a. Hubble kum 25 cham hian thil hmuhchhuah thar a ngah fu a ni.
Kum 2016: Comet 252P/LINEAR an tih chu fiah takin a thla a la a, khawvel mi thiamten galaxy tam tak zinga hla ber nia an rin galaxy pakhat thla a la thei ta bawk. Chuta tang chuan ‘van thengreng’ kan tih mai Universe hi a tira an rin aiin a let 10 laiin a lian niin an ring ta.
Kum 2017: Ni (sun) leh a heltu solar system an tih piah lama planet, exoplanet lian mangkheng a hmuchhuak thar a, Ultrabright galaxy a hmuchhuak leh bawk a, simeikhu kan tih ang comet hla ber nia an rin a hmuchhuak bawk. Tin, galaxy awmkhawm a zawnna lamah a rin loh leh beisei loh tak takin arsi thlawk kan tih ang van sanga thlawk nuai nuai asteroid tam tak a hmuchhuak bawk a ni.
Van sang chanchin ka ziak apiang hian sipai bang anga bo map hi an awm zel a. A mawlmang thei ang berin han sawi fiah tum leh ta ila:-
Van zau zawng leh arsi inkar hlat zawng sawi nan km hman chi a ni lo va, êng kum (light year) an hmang a. Eng hi khawvela thil kal chak ber a ni a, kum khatah km 9.4607×1000000000000-a hla a kal hman. Mihring dam rei zawng hi kum 70 emaw, chakna avangin kum 80 pawh a ni thei e. Arsi dam rei zawng chu kum billion eng emaw zat a ni thung a. Billion khat chu 1,000,000,000 a ni. Kan chenna khawvel tiamin Ni leh a heltu planet zawng zawng awmkhawm hi solar system an ti a. Chu solar system chu Milky Way Galaxy chhunga chhun han pakhat tiat lek a ni a. Thlasik kawng kan tih hi Milky Way Galaxy them a ni. Vanah khian chutiang galaxy lian leh zau mangkheng chu tluklehdingawn 125 vel awmin an hria a. Milky Way galaxy ringawt pawh hi a zau zawng, a lai hawlhtlang chu êng kum100, 000 vel niin an ring bawk a ni. Tichuan, van tukverh, Hubble Space Telescope chuan kum 30 chhungin galaxy a maka maka tam thla a la thei ta a nih chu.
A tawp ber atan chuan Solomona thufing, Juda lal Hezekia miten an ziak chhawn hmangin a hmawr ka han bawk ang e: –
Thil thup hi Pathian ropuina a ni.