Nigeria-ah chawl lova thusawi rei record siam

Nigeria-ah chawl lova thusawi rei record siam
Nigeria-a School of Eloquence chuan team anga thusawi rei ber (longest speech marathon by a team) record an siam a, Lagos-ah darkar 480 teh meuh mai chu chawlh lailawk awm miah lovin thu an insawi chhawk char char mai a ni. He record siam event hmingah hian ‘20 days of Eloquence: Nigeria speaks to the World’ an ti a ni.
He event hi April ni 21, 2026 khan bul tanin, Guinness World Records official adjudication ceremony neiin, niminpiah khan an khar a, Guinness lamin evidence te an endik vek hnuah record an siam tih an puang ta a ni. Chief Adjudicator, Lena Kuhlman chuan School of Eloquence hian darkar 480 (ni 20) chhung chhum lo chat lovin thu an sawi char char thei a, a hmaa hetiang record, 2018-a New Zealand-a Toastmasters District 112-in darkar 127 leh minute 31 a record an siam chu an rawn khum chiang hle a ni.
School of Eloquence dintu leh an school Dean ni bawk, Ubong Essien chuan an hlawhtlinna chu record siam ngawr ngawr mai baka Nigerian-te intellectual leh communicative skills pholan an tumna a ni tel niin a sawi a, “Khawvelin Nigerian te hian idea kan nei a, chu chu kan sawichhuak thiam a, kan chhawp chhuak thei a, debate lamah pawh kan duai lo tih an hre tawh ang,” a ti. He project hi an school kum 20 tlin champha lawmna pakhat a nih nghal thu a sawi bawk.
Record siamnaa tel tur hian thusawi tih vangin duh duh a va sawi ngawt theih loh a, record siam tur chuan thusawitute chuan thuawmze nei ngei an sawi tur a ni a, va riat nawi ve mai mai satliah ngawt a theih loh a, thusawitu te thusawi pawh a inzul leh inlalawn, hawi lam thuhmun a nih a ngai bawk a ni.