Nigeria-ah gang hotuin thaha a vau vangin tlanchhe nasa

Venhim hna thawktute an luhchhuah phuba lak nana Nigeria hmarthlang lama gang pakhat hotuin mi chengte a vau avangin mi sang telin an in leh lo an tlanchhiatsan niin mi chengte leh thuneituten an sawi.
Thuneitute chuan Bello Turji-a hi Nigeria hmarthlanga Muslim chenna hmuna mi tiralkheltu, lo neitu, zirlai leh lirthei khalhtute thah leh ruk bonaa inhnamhnawih nasa ber zinga mi an ni tih an sawi.
Africa-a mihring cheng an tam berna rama tharum thawhna thleng nasa hi US President Donald Trump-a pawhin ngaihvenin sorkar chu Kristiante thah an ni tur veng zo lovah a puh a. Nigeria erawh chuan gang leh helho hian Kristian leh Muslim an an bei ve ve a, Kristian tihduhdahna bik a awm lo niin an sawi thung.
Hmarthlanga Tidibale hnamte chuan Turji-a hian tun hnaia sipaiten beihpui thlaka an pawla mi pakhat an kah hlumnaah khan an hnam chu a hrilhtu leh kawng kawhhmuhtuah an puh niin an sawi.
Turji-a hian ni thum kal ta khan Tidibale tlawhin mi pathum a that a, an chenna chu chhuahsan turin a ti bawk niin Movement for Social Justice & Good Governance-a Sokoto state coordinator Basharu Altine Guyawa chuan a sawi.
“A let leh huna lo la awm an awm chuan a thah tur thu a sawi a, ar thlenga a zuah dawn loh thu a sawi a ni,” a ti.
Heng lai velah hian Islamist hel, Islamic State West Africa Province (ISWAP) leh Boko Haram pawh an tam hle a, kum 15 vel an buai tawh a. Thla hmasa khan US chuan Islamic State helho hi a kap nghe nghe.
Sokoto police thupuangtu chuan Tidibale hnamte hi an hlauh vangin an tlanchhia a, police tam zawk dan an ni tih a sawi.
Tual chhung thuneitute chuan mite hian truck-in km 50 vela hla, Isa an pan niin an sawi a. Isa-a community security committee secretary, Muhammad Ibrahim-a chuan mi 3,000 vel an lut tawh niin a sawi.