Nightclub kang neitu unau tlanchhiaten bail dil lawk

Nightclub kang neitu unau tlanchhiaten bail dil lawk
Goa-a nightclub kang ta, mi 25 an thihna, Birch by Romeo Lane neitu tlan bo mek unau hnih, Saurabh leh Gaurav Luthra te chuan Delhi-a court-ah man an nih hmain bail dilna an thlen.
Luthra unau hi Thailand-a an tlanchhiat hnuah an dawra chhiatna thleng chungchangah man tuma zawn leh India-a hruai let tuma hma lak mek a ni.
An laka Interpol Blue Corner Notice pek chhuah mek unau hian Rohini Court-ah bail dilna hi an thehlut lawk a ni.
Hetih lai hian chhiatna thleng chhui hna chu huang zau zawka thawh mek zel a ni a, Goa Police chuan Delhi-a regional passport office hnenah Phuket, Thailand-a awm mek, Saurabh leh Gaurav Luthra te passport titawp lailawk tura ngenna an thlen tawh.
External affairs ministry pawhin passport office chuan ‘thil ngaihtuah ngai pawimawh tak avangin hriattirna pawimawh’ a chhuah tawh tih a sawi.
Goa-a Arpora tuipui ama nightclub a kan hnu lawkah khan Luthra unau hi Phuket panin IndiGo thlawhna hmangin Delhi atangin an chhuak nghal.
Kum 1982-a India leh Thailand ramten mi man inthawnsak dan tura inremna an siamah chuan ram dang nena inkaihhnawiha dan bawhchhiatna lian leh firfiaka chetna thil thlengah chuan mi man inthawn thin ni se tiin an dah.
He inremna ang hian Luthra unau tlanchhe mek hi Thai thuneituten an chungthu rel turin India-ah an thawn haw thei dawn a ni.
Goa Police hian nightclub-a chief general manager Rajiv Modak, general manager Vivek Singh, bar manager Rajiv Singhania, gate manager Riyanshu Thakur leh hna thawk dang, Bharat Kohli te an man tawh.
Thawhlehni khan a neitu dang pakhat, Ajay Gupta pawh chhiatna thlen atanga a bo vang vang hnuah Delhi-ah man a ni a. Tuipui kam state-ah hian thu zawh fiah tura lak nghal a ni.
A neitu dang, Surinder Kumar Khosla lakah pawh Look-Out Circular tihchhuah niin ani hi chhiatna thlen hnuah a chin hriat a la ni lo.