Nikumah lirthei chetsual- naah mi 56-in nunna chan
Nikumah lirthei chetsual-
naah mi 56-in nunna chan
Kum 2025 chhung khan Mizoram-ah lirthei chetsualna avangin mi 56-in nunna an chan a, lirthei chetsual hi tum 73 a thleng a ni.
Mizoram State Road Safety Council (MSRSC) buatsaih Road Safety Month 2026 chu Thawhtanni khan hman tan a ni a, a hawnna hi Transport minister Vanlalhlana’n a hmanpui.
‘Road safety’ tih hian kawngpui hmangtu zawng zawng – lirthei khalhtu atanga lirthei chuang leh kawngsira kea kalte thlengin a huam tih a sawi a. India ramah kumtin lirthei chetsualna leh hemi avanga thi leh hliam an pung a, a chhan bul ber, zaa 70 vel chu lirthei khalh chak vang a ni tih a sawi.
Nikumah Mizoramah lirthei chetsualna 73, thi 56 leh inhliam 45 an awm tih Vanlalhlana hian sawiin, “A hmaa nileng tlan ngai hmunte kha reiloteah thlen zung zung theih a ni tawh a; kawng a that tawh avang leh lirthei a tlan chak tawh avangin fimkhur a pawimawh a ni,” a ti.
Kum 2019-a Motor Vehicles Act siamthat a nih khan dan bawhchhiate hremna tihnat lehzual a ni, tiin, hei hi khua leh tuiten dan an zawm that theihna atana tih a nih thu a sawi.
8 Kumin hi Mizorama Road Safety Month hman a nih vawi 4-na a ni a. Thupui atan “Sadak Suraksha – Jeevan Raksha (Fimkhur la, i nun humhim rawh)” tih hman a ni.
8 Transport Department leh Police-ten khauh lehzualin bullbar /bumper guard vuah, High Security Registration Plate (HSRP) vuah lo, decibel phal chin aia ringa exhaust tihdanglam, lirthei hlui leh khu bawlhhlawh an endik ang.
8 Transport Department leh Police hian kumin chhungin school leh veng hrang hrangah awareness campaign an kalpui dawn a, a bikin lirthei chesual tanpuituten Good Samaritan Law hnuaia sum an dawn theih dan mipui an hriattir dawn.
8 District tinah DC hoin District Road Safety Council thla li danah vawi khat tal an thukhawm tur a ni a; road safety enletin, accident thlen tamna laiah hma an la tur a ni. e-DAR-ah district-a lirthei chetsualna thleng zat thehluh tur a ni a, kum hmasaa lirthei chetsualna thleng zat nen MY Bharat portal-ah tehkhin tur a ni.
8 Zero Fatality Month (lirthei chetsual avanga thi awm loh thla) atan puan a ni.