Nilaini zan Premier League thlirna

Nilaini zan Premier League thlirna
Kar laihawl inkhelah insawpna lian tham tak tak thlengin, chu’ng zingah chuan table top 10-a lang pha lo Everton-in sili faia an mikhual Wolverhampton Wanderers an hneh telin; inkhel dangah hmahruaitu Liverpool chuan Newcastle United mualah point hnih an hloh then a; pahnihna luahtu Chelsea chuan Southampton khelmualah hnehna nuamsa changin, pathumna Arsenal pawhin an kawtkaiah sihnih faiin team talbuai Manchester United an hneh ve bawk.
Newcastle United 3-3 Liverpool
St James’ Park inkhel nung leh tang zetah mualneitu lam tan Alexander Isak chuan first half-ah goal hmahruai khungin, second half tir lamah Curtis Jones chuan Mohamed Salah siamsak atangin mikhual siphurh sutna goal a thun.
1-1 a nih hnuah Anthony Gordon chuan Magpies hmahruai nawnna thawh ve lehin, he mi hnu hian Salah chuan goal a khung zawn thawt a, Liverpool kha chak thei tawh mai dawna an lan hnu minute 90-ah Fabian Schar chuan Newcastle tlawm tur chhanna goal a rawn thun ve hlauh a ni.
An hmahruaina hum zo lo mah se inkhelh ban ruala Liverpool boss Arne Slot nui hmel khan inkhel hautak a nihzia leh St James’ Park-a point khat hlawhchhuah chu result chhia a ni lo tih a lantir!
Reds hi thlakhat liamta chhung khan home-a hnehna lian lawm tur nei an ni a, Bundesliga champion Bayer Leverkusen, La Liga champion leh Champions League title kawl lai Real Madrid-te an hneh bakah Anfield-ah hian Premier League champion Manchester City pawh an hneh a, mahse, Newcastle mual boruak erawh a dang daih a, tun season-a an game hautak ber a ni hial awm e!
Tun season-ah Newcastle erawh an nghet lo a, November thlatir lamah sikhat faiin mikhual Arsenal an hneh a, thlakhat hnuah team talbuai West Ham an mikhual tumin an han tlawm leh a; Nilaini zanah erawh an quality diktak an phochhuak leh a, top four luah tura an tuihalna hmuh tur a awm bawk.
Southampton 1-5 Chelsea
St. Mary’s Stadium-a mipui 31,193 pungkhawm hmaah Blues-in nuam an tawp a ni ber a; tan atanga minute khatna lekah Axel Disasi chuan mikhual hmahruaina goal thawhin, a hnu lawkah Joe Aribo chuan Saints siphurh rawn sut ve nawlh mah se Christopher Nkunku leh Noni Madueke-te’n first half-ah goal hnihin an chhanglet hman.
Minute 36-ah Marc Cucurella sama a keh avangin Southampton captain Jack Stephens hnawhchhuah a ni a, mahse, a tam zawk an nih hnu hian chawlhlawk hmain Chelsea lamin goal an khung belh thei lo.
2nd half-ah Cole Palmer leh Jadon Sancho-te’n Enzo Maresca team tan an khungbelh a, an chhuahvahna lama an point thum hlawhchhuah hmangin Stamford Bridge club hian goal difference hmanga London club dang Arsenal lehpelin table-ah pathumna an luah chho.
Arsenal 2-0 Manchester United
He inkhela Gunners chakna goal hnih hi second half-a defender ve ve Jurrien Timber leh William Saliba-te tihluh niin, corner atanga ball chhuak hrinchhuah ve ve a ni bawk.
Tun kha Manchester United FC head coach Ruben Amorim tan English football a luhchilh hnua a tlawm vawikhatna chiah a ni.
Portuguese professional football manager Amorim hi November ni 11 mai khan Old Trafford club chuan tun season-a an team talbuai khaichhuak turin an senglut a, Emirates Stadium-a mipui 60,256 tehreng chhuakkhawm hmaah a club thara a chak loh vawikhatna a tawngbaw zui ta a ni.
Manchester City 3-0 Nottingham Forest
October ni 26-a sikhat faia Southampton an hneh hnu khan champion lai City hian inelna hrang hrangah hnehna an chang leh ngai ta lo a, Nilaini zanah erawh an kawtkaiah nuamsain point thum an thawkchhuak a; Etihad Stadium-a goal khungtute hi Bernardo Silva, Kevin de Bruyne leh Jeremy Doku-te an ni.
Game sarih chhung tehreng chak zo tawh lo Pep Guardiola team tan an striker rinrawl ber Erling Haaland chuan goal khung zo lo mah se an star man dang De Bruyne chuan a theihna a pholang a, inrintawkna neikir turin hnehna boruak an hip leh thei ta a ni.
An match khelh hnuhnung vawisarihah City hi vawiruk tlawmin, Europe lamah Feyenoord nen 3-3-in an inhnehtawk hram a, chuti khawpa an chetchhiat tluan rei avangin Nilaini zanah chak an mamawhna a sang a, De Bruyne faktu Guardiola hmel pawh a rawn eng ve leh ta a ni!
Inkhel dangah Aston Villa pawhin 3-1-in an mikhual Brentford an hneh a, pasarihna an luah chho.