Ninganiah US leh Iran inbe leh dawn – Oman FM
Ninganiah US leh Iran inbe leh dawn – Oman FM
Oman Foreign Minister Badr Al Busaidi-a chuan ram pahnih inkara boruak chhe tak awm karah US leh Iran chu Ningani hian Geneva-ah an inbiak chhunzawm dawn tih a puang.
“US-Iran indawrna chu inremna tura a tha lam kal zel beiseina nen tun Ningani hian Geneva-ah neih a ni ang,” tiin Al Busaidi-a hian Pathianni khan social media-ah a tar lang.
Hetiang puan a nih mek lai hian US chuan Middle East-ah sipai leh an hmanruate a chhawp belh zel a, Iran lakah indopui a kalpui mai hlauhthawnna a lian tawh hle.
Oman-in inbiak tur a puan hma lawk hian Iranian Foreign Minister Abbas Araghchi-a chuan nuclear program an neih muanawm taka kalpui leh an ram hrekna tihnep a nih theihna tur intiamkamna tha a awm chuan inbiak an inpeih tih a sawi.
President Donald Trump-a telin US thuneitute chuan Washington hian Iran-in nuclear ralthuam siamna tura ‘uranium a tihchakna a kalpui loh vekna tur’ an dap tih an lo sawi tawh thin.
Tun thla tir khan US Secretary of State Marco Rubio-a chuan Iran nena inremna an siam tumah hian ballistic missile leh an chhehvela an thawhpui hel pawlte chungchang pawh a tel ngei ngei a ngaih thu a lo sawi tawh bawk.
Hetih lai hian Araghchi-a chuan Pathianni khan an thil sawi ho mek chu ‘nuclear chungchang chauh’ a nih rih thu a sawi ve thung.
CBS News hnenah, “Thil dang sawi tur engmah a awm lo,” a ti a, inremna pawh an neih theih ngei a beisei tih a sawi.
Ram pahnih aiawhte nuclear chungchang sawia an indawr thawh hnihna hi February 17 khan an zo va. Thla tir lamah khan Oman-ah a vawi khat nan mi dang kaltlangin an lo inbe tawh bawk.
Araghchi-a chuan Iranian aiawhte chuan ‘rang taka inremna an neih theih nan lehlam lehlamin an ngaih pawimawh thilte siam rema an hlawkpui ve ve theih tur’ pharh tur an duang niin a sawi.
Iranian palai hotu ber hian tun tuma inremna siamna tur an duan chu kum 2015-a President Barrack Obama-a hova Joint Comprehensive Plan of Action (JCPOA) aia ‘tha’ niin a sawi bawk.
“A hmaa mi aia tha zawk tam tak telh a ni,” a ti a, a sawi zau lem lo thung a. “Tunah hian chipchiar taka sawi kan mamawh lo va. Chatuan atan kan nuclear program hi a him tih kan pawm thei a, min hrekna pawh tihnep leh zual theihna tur a ni,” a ti.