Nipui bazar-ah Chelsea an inhralh thei!

Nipui bazar-ah Chelsea an inhralh thei!
Tun nipui transfer bazar an hawn chhung hian Chelsea chuan an player hralh chhuahna atangin pound maktaduai 250 an lei chhuak tling dawn a, chuti zat hmu chhuak tling turin an defender chhawr rim loh Renato Veiga chu Villarreal lamah pound maktaduai 26 tling chho turin an thlah leh dawn mek.
Blues tana Premier League game vawi khat chiah la start Veiga hian Ningani khan Spain ramah medical a paltlang tawh a, kum 22 mi hian La Liga club-ah kum sarih daih contract a ziah rin a ni.
He Portugal international hi Chelsea boss Enzo Maresca chuan season liamta khan a position pangngai left-back atangin centre-back lama khel turin a ti deuh tlat a; chhawr pawh an inchhawr tam ta lo reng a; nipui a han thaw a, first team atanga senior player thenfai hna a thawhnaah ani pawh hi a zuah ta chuang lo a ni.
Kum 2024 khan FC Basel atangin Veiga hi pound maktaduai 12 lekin an leichhuak a, west London club tan match 18 chiah khel mah se tuna an hralhna tur en hi chuan an hlep teuh tho dawn a ni.
Season liamta khan loan-in Juventus tan hun engemawchen a khel a, transfer window hawn tirh lam khan Atletico Madrid-in beisei bawk mah se Yellow Submarine-in an chang dawn ta zawk a ni.
Chelsea hian tun nipui insuan hun laia player 11 an hralhchhuah tur atangin pound maktaduai 251.7 hmuh tlin an inbeisei a, chu chuan player thar pakua lakluhna atana an sum thehchhuah tura ruahman pound maktaduai 277 chu a suhek duai dawn a ni.
An player hralh chhuah man to ber chu Arsenal hnena sum hmahruai pound maktaduai 48 zeta Noni Madueke an kaltir kha niin, Saudi Arabian club Al-Nassr hnena Joao Felix an hralhna fee pawh pound maktaduai 43.7 tling chho turin an inrem a; Kiernan Dewsbury-Hall an hralhna atangin Everton pawhin Gunners sum bawmah pound maktaduai 28 an chhunglut bawk.
Chelsea hian September ni 1-a transfer window an khar hma ngeiin Manchester United winger Alejandro Garnacho leh RB Leipzig midfielder Xavi Simons-te lakluh an la tum leh mek a ni.
A hralhsum lamah pawh Nicolas Jackson, Christopher Nkunku, Raheem Sterling, Ben Chilwell leh Axel Disasi-te chu a duh tana dawr theih turin an la pho chhuak mek bawk.