‘NO TOLERANCE DRIVE/CHECKING” HI A |HA EM?

Dr. C. Lalrampana
Kum 2025 Krismas leh Kumthar 2026; mi tinin dam leh himtlang taka kan hman theih nan Aizawl khawpui chhung hmun hrang hrangah ni 1.12.2025 (Thawhtanni) atangin Aizawl Traffic Police chuan Lirthei kaihhnawih Dan bawhchhiatna leh danin a phut lirthei document hrang hrangte endikin ‘No Tolerance Drive/Checking’ a kalpui dawn a. Lirthei khalhtu/neitu zawng zawngte tha taka dan zawm a, lo inhmakhua theuh turin kan inngen e.
He hunah hian exhaust (silencer) ri ring leh Company-in a vuah sa ni lo, midang tana harsata Siam khawpa eng; head light leh light dang hmangte endik a ni bawk ang.” tiin Nov. 18, 2025 khan Aizawl SP chuan MPR No. 2277/2025-2026 a chhuah a.
Hetianga uluk taka lirthei endik a ni thin hi a thain mipui tan leh lirthei neitu leh khalhtute tan leh mipuite tan a him bik a, kan zavaia hlawk tlanna a ni.
Hetih lai hian zawhna pawimawh tak awm ve thei a awm tlat. Chu chu hei hi a ni. “Eng vangin nge kum tin krismas hun pui hlimawm tak leh January 1, kumthar hun pui hlimawm kan thlen dawn veleha inhriatthiamna tel lova lirthei leh a khalhtute fir taka endikna hi kalpui a nih thin le?” Heng hun puite hi hlim taka chhungkaw kim, thianzaho, chhung khat laina leh laichinte nena hun kan hman thin leh nghakhlel taka kumpuilingleta kan lo nghah leh thlir lawk thin a ni a, hetih lai kara inrikrapna leh ralti reng renga insiamna ni thei, inhriatthiamna/ngaihhnathiamna tel hauh lova inrikrapna lo kalpui ve sek thin hi kan khawsak hona atan hian a fuh ber em? tih hi bengsika ngaihtuah tham tak niin a lang.
Hetianga endikna nunrawng kalpui thin hi lirthei neitu/khalhtu dan zawmtu leh fihlim tan chuan a hlauhawm loh va, dan zawm lotu leh bawhchhia apiangte tan erawh phurrit tak a nih avangin dan anga finfiah tlak lohte chu lirthei endik hun chhung zawng hian inkhalh chhuak lovin an tawmim deuh vek thin niin a lang. Hei vang hian lirthei tam tawh dan ngaihtuahin lirthei mana pawisa chawitir an tlem thei hle a, lirthei chhuak vak a tlem duak a, traffic jam pawh a kiang duak thin. Hei vang hian mi tam takin krismas leh kumthar hun pui hlim taka an hman hleih theih loh phah thei tih sawrkar hian a ngaihtuahpui a ngai ta hle mai.
Chuvangin, sawrkar thuneitute hian hetianga ngaihhnathiamna tel lova lirthei leh lirthei khalhtute endikna hi kum tawp krismas hun pui leh kumthar hun pui thlen dawnah chauh kalpui thin lo hian kum tir atanga kum tluanin endik hna hi kalpui thin se, lirthei leh lirthei khalhtute’n ngaiah an neih chuan kum tin hun pui pawimawh hman dawn apianga ngaihhnathiamna tel lova endik chiam a ngai tawh lovang. Kum tir atanga uluk taka endik lova an khek khawl avangin kum khat a lo vei meuh chuan lirthei neitute leh khalhtute an inthlahdah a, man tur an tam phah mai chauh thin niin a lang. Khek khawl awm hman miah lo turin kum tir atangin a bul tan tha se, a chanve zo tluk an ni mai dawn a ni. Tin, hetianga kumtluana tih a nih chuan chhiah pumpelh tum leh phakar chhuah tum tan pawh risk lak ngam a har ang a, sawrkar pawhin chhiah tam tham zawk a dawng kum tin thei zawk dawn a ni. Tin, lirthei neitute leh khalhtute tan pawh kum bul atanga dan an zawm thlap thlap chuan document up to date chawp chûk chûk a ngai tawh lovang a, kan zavai atan a hahdam thlak theuh zawk dawn a ni.
Lirthei lam kaihhnawih sawi takah chuan kum khat danah late fee chawi ngai loa Document leh a kaihhnawih tihfelna hun Sorkar hmasain December thlaa a kalpui thin angte khan tun kan sorkar hian a ti ve dawn lo nge, thingtlang lam tan chuan hetiang hun hi a nghahhlelhawm ve viau thei tlat. No Tolerance drive/Checking hi neih thin ngei chu a tha a, mahse, neih hun dika neih dan tur erawh sawrkar hian uluk taka ngaihtuahin ruahmanna siam tawh se a lawmawm ngawt ang.