No Vehicle Zone ti leh dawn

No Vehicle Zone ti leh dawn
Kumin hunpui laiin Aizawlah Assam Rifles Canteen kual leh Chanmari kawn inkar traffic tih ziaawmna atan ‘No Vehicle Zone’ ruahman dan relin Nilaini khan chief secretary Khilli Ram Meena kaihruaiin a kaihhnawih sawrkar hotute an thukhawm.
UD& PA secretary Lalmalsawma Pachuau chuan No Vehicle Zone siam chhan leh ruahman thin dan a sawifiah hmasa a. Krismas leh kumthar vuakvetah Aizawl khawpui bazar hmun tawt lutuk tur tihziaawmna atan leh zalen taka mipui an bazar theihnan kum 2009 atang tawhin Canteen kual leh Chanmari kawn inkar kawng chu lirthei tlan theih loha siam thin a ni tih a sawi. Kuminah pawh December 23, 24 leh 31 chawhma dar 10 leh tlai dar 4 inkar chhung ‘No Vehicle Zone’ kalpui leh tura rel a ni.
Aizawl khawpui chhung traffic nghawng ve lohna hmuna lirthei intlanchhawk kalpui dan ennawn dilna chu Unified Transport Coordination Committee on Traffic Management-in uluk taka a zirchian tura tih a ni bawk.