Non tax revenue-ah sum lut tam se – Taxation minister
Sawrkar sumbawmah chhiah ni lo, mipuiin an chawi ve tho – non tax revenue lut tam deuh thei se tul a tih thu Taxation minister Lalchamliana chuan a sawi.
Thuthar thehdarhtute hmaa a department chan hmalakna a sawinaah Lalchamliana chuan a mimal ngaihdanah, state sum tipung turin sawrkar dan anga chhiah lakna atanga sum lut (tax revenue) bakah chhiah ni lo mipuiin an chawi atanga sum lut (non tax revenue) atangin sum lut tam deuh se a duh tih a sawi a. Heng zingah hian a tel loa kan awm theih loh leh sawrkarin mipui phurrir tur chhawk zangkhai nana sum senso tam tak a tum mekna – tui thianghlim leh electric eng, buhfai ang chi ah te sawrkar chu hlawk chuang lo, chawi belh chuang loa a kal theih nan mipuiin chawi tam inhuam deuh se a duh tih a sawi a ni.
Sawrkarna an chan chhungin Taxation department chu tax revenue collection-ah nasa takin a thang a, sawrkarin chhiah atanga sum hmuh tura a tuk an khum thu a sawi.
Zawhna chhangin minister chuan, Mizoram sawrkarin petrol leh diesel-a chhiah a lak thin tihsan a tum, kum 2021-a a tihhniam leh tak chu tih san thar tumna a nei loa, tihniam tur hian sawrkar laipui atangin thu an dawng zawk tih a sawi.
Taxation minister sawi thenkhat:
# Sawrkarin sum hmu tura a tukah 2018-2019 target chu vaibelchhe 483 a ni a, chhiah atanga an hmuh zawng zawng chu vbch. 578 a ni. 2019-2020 ah target vbch. 573 a nih laiin, chhiah atangin vbch. 667 an hmu. 2018-2019 leh 2022-2023 chhunga chhiah hmuh tura bituk chu vbch. 3474 a ni a, vbch. 3836 hmu tawhin, vbch 362-in an khum tawh. Kum 2023-2024 ah July thlengin vbch. 415.84 an hmu tawh bawk.
# District thar pathum – Hnahthial, Saitual leh Khawzawl ah Deputy Commissioner of State Tax office hawn tura hma lak mek niin, sawrkarin phalna a pe tawh. Thawktu mamawhna thlen pawh sawrkarin phalna a pek tawh.
# Sales Tax leh VAT hunlaiin Mizorama bungraw luhna kawng hrang hrangah border check post dah a ni thin a. GST hman a nih hnuin GST Council-in ‘One Nation, One Tax, One Market’ thupuia a hman avangin India rama state hrang hrangte insumdawn tawnnaa harsatna awm theih angin, border check post a awm a rem tawh lo.
# GST dan hnuaiah e-Waybill check nan Data Collection Center din a ni a; Vairengte a border check post awmna hmunah kalpui mek a ni.