North Korea-in South Korean Chip an tichingpen

North Korean hackers te chuan South Korean chip equipment makers te an hack tiin South Korea spy agency te chuan an sawi.
Pyongyang chuan a weapons programme ah semiconductor siam tumin hma a la mek tiin National Intelligence Services (NIS) te chuan an sawi a.
Thla kalta khan South Korean President Yoon Suk Yeol chuan South Korea inthlan tibuai turin North Korea chuan cyber attack te a kalpui thei tiin a lo sawi lawk sa tawh a ni.
Nikum khan North Korea chuan President Yoon thuihhruai email an lo hack sak tawh bawk a.
“North Korea hian ama pualin semiconductor siam a tum ngeiah kan ngai a, hrekna a tawh avangin a mamawh semiconductor te a chawlut thei si lo a ni” tiin NIS te thuchhuah chuan a tarlang.
Pyongyang chuan a weapons programme kalpuiah chips te a mamawh tlat a, a satellite leh missiles siamah te chips a mamawh a ni a ti bawk a.
NIS te chuan north Korean hackers te chuan an chip equipment company pahnih servers te chu nikum December leh February khan an hack ve ve a, product design leh facility thlalak te an la chhuak tiin a sawi a.
Company dang te a bik takin chip siam tu industry te chu North Korea cyber attack laka fimkhur turin an tizui nghal bawk a. Chutihrual chuan spy agency chuan eng firm ber nge hack tawk tih leh North Korea chuan thil pawimawh an lachhuak em tih a sawi lo thung.
NIS te chuan nikum atang tawh khan North Korean hackers te chuan South Korean company te chu an thlurbing char char tawh tiin an sawi bawk a. Hackers te chuan technique chikhat ‘living off land’ tih mai chu hmangin hei vang hian hacker te an che tih hriat a har em em an ti bawk.
Pyongyang chuan cyber-crime kalpuia puhna chu a la hnawl ziah a, mahse, Seoul chuan North Korean hackers te chuan cryptocurrency hmangin sum tam tak an la chhuak tawha chung te chu a nuclear programme kalpui nan a hmang an ti bawk a. Kum 2016 atang khan North Korea chuan hackers te hmangin $3 billion vel a lachhuak tawh tia sawi a ni.