Norway an chak nghal

World Cup leh Euro velah inlan tam thei lo chunga World Cup 2026 khelh meka team ngaihven hlawh zinga mi Norway chuan Thawhleh zanlaiah khan an match hmasa ber an khel a, 4-1 in Irag an hneh. Iraq lakah hian Erling Haaland chuan goal hnih a thun.
World Cup 2026 khel tur zawnaa khel tha tak, an khingpuite hneh vektu Norway hian goal thun thei bik Erling Haaland vangin ngaihven an hlawh leh zual a, an pumrua a len tlan em vangin huphurh an hlawh tel bawk. Mi en chak an nih ang ngeiin tha takin an inlan a, phu takin point thum an hmu.
Iraq lakah hian goal thun tura beisei Haaland chuan minute 29-naah vannei ang reng takin Norway hmahruaina goal a thun. An chet fuh tawk loh vangin goal chhuah bawk mah se Iraq an insiamtha thuai a, Aymen Hussein chuan minute 39-naah goal thunin an si phurh a sut.
1-1 a nih hnuin inkhel a hmuhnawm zui a, Norway goal thun leh thuai tuma tan khawhin, an hlawhtling thuai. Hmahruaina goal thuntu Haaland chuan minute 43-naah hma an hruai nawn lehna goal a thun. Goal thun tur ni awm renga piang Haaland hian World Cup a khelh hmasak berah goal hnih a thun leh nghal der a. A world cup hmasa berah hattrick siam a tumna erawh uiawm takin a puitlin zo ta lo thung.
Chawlhlawk hnu lamah inkhel a hmuhnawm chhunzawm a, goal hnih a luh belh leh. 2-1 a hmahruai tawh Norway tan Leo Østigard chuan minute- 76-naah goal thunin an hmahruaina a tizau a. Hun pek belh minute 90+6-ah Iraq player Aymen Hussein chuan an lamah ti-goal in Norway goal lina thunsak a, 4-1 in an tlawm zui ta a ni.
Iraq lakah point thum hmu bawk mah se Norway hian Senegal leh France an hmachawn zui leh dawn a, hna hautak zawk thawkin, fiahna hautak an hmachhawn zui leh a ngai dawn a. An dinhmun a chhiat loh laiin Iraq dinhmun a chhe viau thung.