Nottingham khawpuiah Briton pahnih champ

Nottingham Open 2023 khelh zawh tak mipa leh hmeichhe singles-ah tualchhung mi ve ve an champion.
Kum 46 chhunga a vawikhatna atan WTA final-ah British player ve ve intumin, Katie Boulter chuan 6-3 6-3-in a chipui leh a thian tha tak ni bawk Jodie Burrage a hneh a, a career-a a vawikhatna atan WTA title a hlawhchhuak.
Robin Hood-a tuallenna nia sawi Nottingham khaw tournament liana British women’s number one ranking luahtuin hmeichhe title a lak lai hian mipa lamah Andy Murray a champ ve thung a, 6-4 6-4-in final-ah France mi Arthur Cazaux a hneh.
Thla thar mai hi Wimbledon khelh hun a ni tawh a, chumi atana warm-up tournament pahnihah Murray hi a champion zawn a, Nottingham-a title a lak hma chawlhkar khat liamta maiah khan Surbiton Trophy hawn bawkin, grass-court title la zawn thei kum 36 mi hi grass-court grand slam atan pawh inrintawkna nei chho leh tura beisei a ni.