NPA la zinga intiamna bawhchhia doctor zawt

Mizoram sawrkar chuan a hnuaia medical doctor zinga non practicing allowance (NPA) la, private lama thawk tel tho si a enkual mek.
Health department under secretary chuan tunhnai khan principal director hnenah NPA la zingah, private-a damlo enna atanga sum lalut la awmte chu an list pe rang turin a hriattir.
Mizoram sawrkar hian a hnuaia thawk medical doctor zingah, an hlawkna atana pawnlama hun an hmang tam lutuk tur venna atan, private damdawi in emaw mahni puala clinic hawng lo hnenah NPA hi a pe a, an basic pay atanga zaa 20-a chhut thin nia sawi a ni.
Sawrkar damdawi ina thawkten an damlote tana hun tam zawk an hman theih nan, NPA la te chu private damdawi in emaw mahni puala clinic hawng lo turin intiam tir an ni a. Heti chung hian la ti an awm nia hriat a nih avangin, sawrkar chuan hetianga la ti te list hi thehlut rang turin Health principal director hi a ti a ni.