Nuai 9200 sengin Tuipui D lei dawh dawn

Darzo Kai, Tuipui ‘D’ kaina tur lei lian chu cheng nuai 9200 senga dawh a ni dawn tih Commerce minister Dr R Lalthangliana chuan a sawi.
Zirtawpnia South Tuipui MNF South Block Political Leadership Training, S.Vanlaiphaia neih a hmanpuinaah South Tuipui bialtu MLA ni bawk Dr R Lalthangliana chuan Tuipui D lei dawh a nih theihna’n hian nasa taka sawrkar laipui hotute a nawr hnu ah a hlawhtling ta tih sawiin, MNF sawrkar hnuaia hmasawnna ruhrel lian tak a ni tih a sawi. He lei dawh tur atan hian a bul vel amite tan compensation pek tur cheng nuai 700 pawh DC office-ah a awm tawh nia sawiin, Delhi a kal apiangin Border Roads Organisation hotute leh Finance ministry lam nasa takin a nawr ziah a. China ral lo lian ta se, a tangkai dan tur a sawi chu central lam pawhin an ngaihpawimawh phah hle, tiin, thla thar hian chief minister Pu Zoramthanga emaw central minister-in emaw a lung a rawn phum dawn tih a sawi a ni.
“Hei hi tu sawrkar kal tawh mahin an la tih theih ngai loh, Siaha/ Lawngtlai district mipui Aizawl panna atan mellung pawimawh tak a ni dawn a. Tuna Kawlchaw lei sei an dawh ai pawh hian a sei zawk anga, tui a len lai ber pawha a chim phak ngailoh tura sangin kan dawh dawn. Truck lian ke 14 nei pawh a insulpel zur zur thei dawn, tiin Dr R Lalthangliana hian a sawi a. Tender chhuah tawh niin, June thla chuan a thawktu tur contractor hming hriat hman beisei a ni tih a sawi.
Pang khua atanga chhuk thla, Bualpui to Saisihchhuah kawnga lei lian dawh tur pawh central lam a nawr nasa a. Hmasawnna ruhrel lian tak, lei lian dawh theih tur chu, Myanmar politics buai a reh hnuah insumdawn tawnna atan rotling tak a ni dawn tih a sawi a ni.