Ukraine-in Russia tana beitu Chinese sipai pahnih man

Ukraine-in Russia tana beitu Chinese sipai pahnih man
Ukrainian sipaiten Chinese pahnih, Ukraine khawchhak lama Donetsk region-a indonaa Russian sipaite puitu an man niin President Volodymyr Zelensky-a’n a sawi.
Ukrainian president chuan intelligent-ten Russia sipaiteah hian tuna mi pahnih aia tam hi an awm ngei a rinawm tih an sawi tih a sawi.
Ukraine Foreign Minister Andrii Sybiha chuan Ukrainian ram chhunga Chinese sipaite an awm tih hriat hian ‘China-in muanna a duh’ tih a sawi chu a rinhlelhawm ta tih sawiin Kyiv-a an palai chu sawi fiah turin a ti.
Sipai man hi Ukraine-a indonaa China-in mihring tirin Russia a pui tih fiahna hmasa a ni a. Moscow emaw, Beijing emaw atanga thuchhuah a la awm lo.
Zelensky-a chuan sipaite hi Ukraine khawchhak lama Donetsk region-ah an nihna tichiang thei lehkha, bank card-te nen an man a, ‘an mi mal chanchin’ pawh a chuang tih X-ah a tar lang.
Ukraine sipaite hi Chinese sipai paruk nen inbeiin pahnih an man tih a sawi.
Zelensky-a hian video-a dah telah Chinese an man nia a sawite hi handcuff-a phuarin Mandarin Chinese-in an tawng lai a lang bawk.
“Chinese mi leh sa hi tuna kan manna hmunah hian anni pahnih lo pawh hi an awm ngei tih thu kan dawng a ni,” a ti.
Zelensky-a hian ‘United States, Europe leh ram dang muanna duhtute chu che chhuak turin’ a ngen.
Thil chhui zui mek niin an mi mante hi Ukraine-a security service-ten an kawl tih a sawi.
Ukraine-a foreign minister chuan Kyiv-a Chinese charge d’affaires chu ‘sawi fiahna phutin’ an ko tih a sawi.
X-ah Andrii Sybiha chuan, “Russia-in indonaa Chinese mite a teltir hi kan dem a, Ukrainian sipaite dotua a hmang hi kan duh lo,” a ti.
North Korea chuan Russia-in Ukraine a rûn meknaah hian sipai sang tel a thawn niin Kyiv leh khawthlang ramte chuan an lo sawi tawh thin bawk.
Thawhlehnia thuthar lakhawmtute a kawmnaah Zelensky-a chuan, “North Korean-te hian Kursk-ah min do va, Chinese-te hian Ukraine ram chhungah min bei thung,” a ti.
January khan Ukraine hian Russia-a Kursk Oblast-ah North Korean sipai pahnih an lo man tawh.
Beijing leh Moscow hi politics leh sumdawnnaah inpawh hle mah se China hian indonaah hian tan zawk nei loh a tum hle a, Russia hnenah ralthuam a pe nia puhna pawh a pha thin.
Russian President Vladimir Putin-a chuan Ukraine hi kum 2022 khan a rûn tan a, Moscow hian Ukraine ram chin 20% chuang mah a thunun tawh a, a tam ber hi khawchhak lam a ni.