Nuggets in final an lut

Thawhleh zing khan NBA Western Conference play-off final game lina khelh a ni a. Inkhel hmuhnawm takah vawi thum chak zawn tawh Denver Nuggets chuan Los Angeles Lakers an hneh nawn leh a, 4-0 in an chak a. Tui let hnu lamah a vawi khat nan NBA Final an lut.
Game hmasa pathuma tlawm zawn tawh LA Lakers hian game linaah hnehna chan ngei tumin tan an khawh a, bul pawh an tan tha thawkhat viau bawk. Lakers hi quarter khatnaah point rukin an sang zawk a. Quarter hnihnaah khel tha chhunzawmin, point kua ngawtin an chungnung zui leh a. Chawlhlawk a nih meuh chuan point 15 ngawtin an sang fal der tawh.
Point 15-a hnufual chunga chawlhlawk hmang Denver Nuggets hi chawlhlawk hnu lamah an insiamtha a, quarter thumnaah an khel tha chungchuang hle. Quarter thumnaah point 20 zetin chungnung zawkah an tang a, point nga ngawtin an khingpuite an lehthal. Point ngaa hmahruai chungin quarter hnuhnung ber an hmachhawn a, inrintawkna sang tak nen an inlan zui. Quarter hnuhnung berah hian LA Lakers an khel tha zawk tlat thung a. Point thumin chungnung zawkah an tang a. Nuggets nen an inkar tizim viau mah se point hnihin an khingpuite an umphak zo lova, uiawm taka tlawmin, an puanthuah an tel zui ta a ni.
LA Lakers hnawkchhuaktu Denver Nuggets hian NBA final-ah Miami Heat leh Boston Celtics te inkhela chak zawk zawk an hmachhawn dawn a. Eastern Conference play-off final game thum khelh tawhah Heat hian 3-0 in hma an hruai mek a. Tukin hian game lina khelh a ni a. Heat hi an chak nawn leh a nih chuan Nuggets hmachhawn turin final an lut ang.
Point 15 zeta hnufual chunga an khingpui an lehthal theih nan Denven Nuggets tan MVP hlui Nikola Jokic a khel tha chungchuang hle. MVP vawi hnih lo ni tawh Nikola Jokic hian point 30 a thawkchhuak a, ball sawhlet vawi 14 ngawt a dawn bakah assist vawi 13 a nei bawk a, treble doubles a puitlin. LA Lakers lakah 4-0 ngawta an chakna kawngah Denver Nuggets player pawimawh Nikola Jokic hi Magic Johnson Western Conference MVP hlan a ni nghe nghe.
Final game linaah hian Lakers player pawimawh LeBron James a chetha viau a, point 40 zet a thawhchhuah bakah ball sawhlet vawi 10 dawng a, assist a nei tling bawk. James hi mimalin che tha viau mahse an team a chakpui zo chuang lo thung.