Nupa inbiak tawn dana in\henna thlentu

Nupa inbe khât, titi dun ngai lo, lawmna leh lungngaihna te pawh sawi dun ngai lo inthenna thlentu chhan langsar tak pakhat a ni.
Relationship lama mithiam te chuan, ‘nagging’ an tih mai, tih tur inhrilh reng mai ang chi te pawh inthenna bul a ni tih an sawi. Kawppui te hnena tih tur hrilh reng mai te, thurawn pek deuh reng a, an thil tih tura rawtna lo neih ve zung zung te, chutiang chu ‘nagging’ an ti a, nupa inthenna thlentu langsar tak niin an sawi.
Nupa inbiak tawnna leh inbiakpawh dana inthenna thlen thei dang leh chu, kan ngaihdan ni lo tak thil a lo thleng a, chutiang huna kan ngaihdan dik tak sawi lo va, kan ngaihdan ni lo zawk sawi kan chin hian inthenna a thlen duh hle niin an sawi. I rilru takin ‘aih’ tih i duh a, mahse, inhnial buai leh inhauh emaw intih thinrim emaw te i hlauh vangin ‘aw’ i ti ve ta ngawt a.
Kan duh lo zawng tak duh anga kan lan hian, kan lungnih lohna leh lungawi lohna te chu chhunglamah a inup khawm a, chutianga thil tam tak lo inup bet tawh chuan puahkeh hun a nei leh tho si a, a inup hnem zawh poh leh a puak chu a na ting mai a ni.
Nupa inhnial leh inhauh nikhuaa a chak zawk leh thiam zawk nih tum tlatna hi nupa nun chawkbuaitu langsar tak pakhat a ni. Kan inpuh tawn a, thiamthu kan sawi a, a thiam lo zawk nih kan hreh ve ve si a, chu chuan nupa inkar a tichhe ta vek thin a ni.
Kawppui te tawng laklawh lai lo pawhchah sak sek te hi nupa inhauhna thlentu leh inthenna hial pawh thlen thei a ni. Eng emaw kan sawi a, kan kawppui ten an ngaihdan an rawn sawi ve dawn dek dek kan lo pawt chat zung zung a, an duh leh rilru pawh sawi chhuak thei lovin kan siam ta thin a, chu chuan nghawng tha lo tak a nei thin a ni.
Mipa thenkhat chuan an nupui te an chhan dan tur an ngaihtuah chhungin a hmeichhe lamin chhan an duh hmanhmawh vangin an lo nawr leh sek sek thin a, chu chu an ning hle niin an sawi. A nih loh pawhin, an zawhna hmasa zawk pawh an chhan fel hmain zawhna dang te an lo nei leh hman tawh thin a!
Nupa inhauhna thlentu langsar tak pakhat chu a tha lai inhmuh sak thiam lohna hi a ni duh hle. An tih that aiin an tihsual leh fel lohna lai te kan hmu lian hma hle a. An tih thata fak aiin an tihsuala hauh/sawisel chu nuam kan tizawk emaw tih mai tur a ni. hei bakah nupa inkara ‘politeness’ kan tlakchham hian inhauhna a ti tam duh hle bawk.