Nupa inkar buai chinfel dan

Nupa inkar buai chinfel dan
In innei rei ve tawh viau a, fa pawh in nei nual tawh a ni mai thei. Mahse, in nupa inkar chu tunhma ang a ni ta lo. Chhungkua, fate leh khawtlang leh Kohhran bakah in hnathawh te avangin in nupa inkarah neuh neuh a tam tan ta khawp mai.
Nuam lo tih chang i ngah a, in nupa inkara boruak rit awm chu engtin emaw chawi kan dawrh theih dan awm se i ti rilru viau a ni mai thei. Nupa thenkhat chuan hetiang hi inneih rei tawh chuan thleng ve tur reng ni-ah te an ngai a, mahse, chutiang tur chu a ni si lo.
Relationship lama mithiam ten chutianga nupa nuna harsatna hrang hrang kan tawh changa tih dan tur tha ni a an sawi te kan rawn tarlang e.
1. I kawppui nen chuan titi-in thil sawi dun tam rawh u. Fate buaipui an ngai a, eizawnna leh khawtlang leh Kohhrana mawhphurhna hrang hrang nen, nupaa inkawmna hun kan ngaihthah a, hun pawh nei tlem niin kan inhre thin. Mahse, a pawimawh ber nupa nun chu kan hlamchhiah hauh tur a ni lo. I nitin hun hman dan te ngaihtuah la, nupaa inkawma, titi dunna hun i nei lo a nih chuan i hun hman dan thenkhat chu titlemin, nupaa titi-na hun insiam ang che. Zingkar leh zan mut hmun emawa thil sawi dun titi fo te hi nupa nun phuar nghettu tha tak a ni.
2. Thil tih dun tam tur a ni. Eng nge in nuam tih zawng te ngaihtuah la, nuam in tih dun theih tur ngaihtuah rawh. Zanriah eikhama khawlai han len dun mai mai te emawin bul han tan la. Rilru la peng thei phone leh thildang te keng loin han teihawi dun mai mai teh u. Chu hun chu titina remchangah te hmang nghal u la. mahse, fate chungchang emaw, mahni hnaa buaina chungchang te emaw, chhungkuaa harsatna chungchang emaw te chu sawi loh a tha zawk. Inpahnih inkar te chu sawi zawk u la, in ngaihdan leh i kawppui laka i rilru puthmang te sawi a fuh zawk ang.
3. Inneih hnuah pawh la inrim fo tur a ni. Inrim tih vanga thil danglam tehchiam a ni chuang lo. Inpahniha nuam intih a, in-enjoy theih tur thil tidun thin rawh u. Hei hi a khat tawka tih fo a tha. Khawiah emaw zanriah eichhuah te, zin khawthawn dun mai mai te, ennawm en dun te, lui kal emaw, ramhnuaia vah mai mai te emaw te pawh tidun thin rawh u. Chu chu dah pawimawh hle la, engmah indal tir suh. In nupa inkar boruak chawi nungtu atan a tha hle tih hria la, inthlahrung hauh suh ang che.
4. Nupa tam takin inneih rei tak deuh hnuah mipat hmeichhiatna hman dunna kawngah ngaia neih emaw, nin deuh tlat chang te an nei thin. Nupa nun hmanna kawngah routine ang deuha neih a, a ni ve tur reng anga ngai te pawh a awm theih. Chutiang ngaihdan chu thlak a hun ta. Bedroom nupa nun chu inchawh phur tawna, intihhlim tawn theih a. Bedroom nuna nupa kan intih hlim loh hian harsatna tam tak a thlen thin a, kan intihhlim tawn erawh chuan kan inkar boruak a tha duh riau thung. Thil thar han tih ve chhin te pawh hreh tur a ni lo. Nupa inkarah chuan duhdan te pawh inhrilh hreh tur a ni lo.