Nupa kar siamthat nan eng nge kan tih ang?

Nupa kar siamthat nan eng nge kan tih ang?
A kum telin nupa inthen an pung a, sap ram a ni emaw, vairam a ni emaw a dang chuang lo. Khawvelah kumtin nupa inthenna parcentage hi a sang tual tual niin zirchianna neitu ten an sawi. Engvangin nge nupa an inneih rei theih tak mang loh a, nupa inthenna hi evanga pung telh telh nge tih te hi ngaihven ngai tak a ni. Nupa inkar a buai deuh apianga inthen mai chu buaina chinfelna tha ber tur ni a ngai tlat kan tam tak niin an sawi.
Relationship lama mithiam te chuan nupa inneihna boruak kan vawn nun theih nan thil pawimawh a awm niin an sawi. Inlaichinna dang ang bawkin nupa harsatna an tawk thin a, chutiang hunah chuan puitu an mamawh ve thin. Thil tha nei tur leh nupa inlaichinna tha nei tur chuan awm mai mai a neih theih a ni bik lo a, eng emaw tak kan tih ve a ngai thin. In nupa inkar harsatna te chu dahtha a, enliam mai mai ringawt lovin, engtin emaw tal hma la rawh le, chuti chuan a hlawkna pawh i tel ngei ang.
A hmasa berah chuan nupaa thil sawi dun tam hi a pawimawh. In inneih hnuah i hriat loh karin nupain thil insawi dun tlem telh telh ang a, in titi dun tlem tial tial ang, chu chuan inlaichinna zawi zawiin a tichhia ang. Nupa karah engkim inhriat tlang vek a tha kan ti thin a, chu chu nupaa thil kan sawi dun thin chauhin a neih theih. I hnaah i buai hle emaw, fate enkawla buai a ngai emaw, in chhung sekrek khawihin i buai hle emaw pawh a ni thei, mahse, nikhatah minute 15 tal nupaa thil sawi dunna leh titi dunna hun insiam ang che u. Thil sawi dun tih hian eng emaw thil pawimawh sawi kher pawh a tul chuang lo, chhungkaw thil emaw, hna lam a ni emaw, chutiang ni kher lo, thil ho mai mai pawh a leng vek a ni.
Kan nupui/pasal te chu kan kawppuite an nih angin kan zah thiam tur a ni a, kan ngaihlu thiam tur a ni. Mahni inngaihhlutna pawh nei thei lek lo khawpa kan kawppui te thunun a nih chuan chu chuan nupa inlaichinnaah rah tha a chhuah lo ang. Clinical psychologist Seema Hingorrany chuan, “I nupui/pasal a nih vang khan i nuna mi pawimawh tak a ni a, mahse, chumi avang chuan ani kha bungrua ang maia i ‘ta’ a ni lo. Ani chu i bungraw neih zinga pakhat ang maia i duh duha i tihkual tur a ni lo,” a ti. In pahnih chauha in awm dun lai a ni emaw, in chhungte bulah emaw thiante bulah emaw pawh ni se inhnuaichhiahna engmah a awm tur a ni lo. Nupa chu inzah tawnin, an inngaihlu tawn tur a ni.
Nupa chu ngaihdan a inang reng thei bik lo a, inhnial chang leh inhmuhthiam loh chang te pawh a awm ve thin. Chutiang boruak chu kan tawn avangin kan nupa inkar a chhe ta tihna a ni lo, chutiang boruak tawng lo nupa an awm bik kher lo ang. Chutiang hunah chuan a dawhtu leh zaidawh zawkah tan hreh tur a ni lo a, chu chu tlawmah lak tur pawh a ni lo. Chutih rualin i ngaihdan ni miah lo, i duhdan pawh ni lo chu i kawppuiin a tih avang maiin engmah sawi lo va lo ‘OK’ ve zel ringawt tur tihna erawh a ni lo. Hetah hian nupaa thil sawi dun a titi dun tam tur tih kha a pawimawh leh ta a ni. A tlawm zawk leh chak lo zawk, a thiam zawk leh thiam lo zawk anga lang thei boruak te pawh neih loh a tha a, engkimah inlungrual theihna zawn thiam tum tur a ni.
Sum leh pai chungchangah zep ruk neih hi nupa inkara buaina thlentu langsar tak a ni thin. Nupain bank account hrang kan nei a ni mai thei a, chutah chuan pawisa kan khawl ve ve pawh a ni maithei, chutihlai pawimawh ta chu i kawppui chuan i sun neih dan chu a hre ve tur a ni. I pawisa hman dan te, i khawl dan te, i invest dan te pawh a hriat ve kha i kawppui a nih avanga a chanvo a ni. pawisa hman danah kuhva leina tih nen lama hriat tum ve vek kher lam a ni lo tih kan hrethiam ang chu maw. Tin, sum chungchangah hriatthiam loh kan nei a nih chuan sawi hreh tur a ni lo va, tha taka inzawhfiah mai tur a ni, mahse, kan tawngkam hman erawh fimkhur a ngai a, inringhlel anga lan theihna tawngkam kan hman palh chuan boruak a sosang hma khawp ang.
Kawppui te chhungte nena boruak tha neih a pawimawh khawp mai. Mahse, hei hi a harsat riau chang a awm ve thin. A bikin hmeichhe lam inkarah boruak neuh neuh a awm hma duh bik. Kan kawppui te chhungte chu kan ngaina em em lo a nih pawhin chu chu kan kawppui te bulah kan tihlan loh a tha ber. Kan kawppui te chhungte nena boruak tha lo neih ai chuan boruak siamtha zawnga hmalak hram hram tum tur a ni a, chu chu nupa inkar boruak tihthat nan pawh a pawimawh.