Nupa nun hlimawm nei tura thilpawimawh

Nupa nun hlimawm nei tura thilpawimawh
Kan intawntirh a kan induhna leh inhip tawnna te chuan inngaihzawnnaah min hruailut a, chu chuan nupaah min siam ta. Nupa nun chu ‘damchhung’ atan a lo nih takah chuan, a nuamah emaw a hrehawmah emaw ti zel thei tur chuan induhna leh inhip tawnna ringawt a tawk tawh lo. Tun tumah hian relationship lama mithiam nupa nun hlimawm leh nghet nei tura pawimawh ni a an sawite kan rawn tarlang e.
1. Kawppui te dinhmuna indah thiam a, an rilru leh ngaihtuahna tawmpui thiam a pawimawh. Inhriatthiam tawn hi a pawimawh a, chu chu kan mamawh pawh a ni, chu ai pawha la pawimawh leh zawk a, kan kawppuite dinhmuna indintir a, anmahni thlir tur atanga thil thlir thiam ve hi a ni. Hetiang hi kan thiam zawh poh leh kan kawppui ten kan ‘care’ tih an hrechiang telh telh thin. Hetia an dinhmuna kan indintir thiam phawt chuan kan buaina thin tam zawk hi chu awlsam takin kan chinfel zung zung thei thin dawn a, chu chu nupa nun hlimawm nei tura thil pawimawh tak a ni.
2. In ngaihhlut thiam hi a pawimawh hle bawk. Tute pawhin min ngaihlutu te bula awm nuam ka ti a, min ngaihlutu te chu kan ngaina mai thin. Kan hmangaih tak ten min ngaihhlu tih kan hriat bawk si chuan, chu aia nun nuam zawk chu a tam tawh bik chuang lo. A thiltih te i hriat sak a, i ngaihhlut sak thiam zawh poh i kawppui chu i tihlim nasa a ni mai. Thil hotê pawh ni se, eng nge a tih tih te i hriatpui a, a thil tih chu a tih tur ve hrim hrimah ngaihsak mai lo va, i hlut sak thiam khan, nupa hlimna tura thil pawimawh tak a ni. I thil tih nena khaikhin chuan a thil lo tih ve chu a beitham hle pawh a ni mah na, mahse, chu chuan a thil tih i ngaihhlutna kha dal suh se.
3. Ngaia inneih hi thil awl tak a ni a, hei hi nupa tam takte kehchhiatna a ni fo. Kan lo awmdun rei ta a, kan thil tih leh chetvelna te ngaiah kan inneih sak chin hi a lo awm thuai mai thin a, chu chu nupa nuna ngêt siamtu hmasa a ni fo. Kan kawppui ten kan tana thil min tihsak te chu a lo rei deuh chuan ngaiah kan nei a, lawmna chang kan hre lo tial tial thin. Chuvangin, kan kawppui te thil tih leh awm danah te lawm thiam hi a pawimawh hle a ni. I eitur a siam sak thin che kha ngaiah nei mai lovin, lawmthu hrilh thin la, inchhung sekrek a khawih thin te kha ngaiah nei mai lovin lawmthu hrilh thin rawh. Chutiang bawkin chhungkaw tana a sum thawhchhuah te kha ngaiah nei mai lovin lawmthu hrilh thin rawh. Lawmthu inhrilh nan hian thil tê lua a awm lo a nia.
4. Kan duh anga thil awm thei tlat lo hi a awm ve thin a, chutiang hunah chuan a nih ang ang a nih tir mai thiam hi nupa hlimnan a pawimawh khawp mai. I nupui emaw pasal emaw khan eng emaw a thil chin thin, ti lo tura duh deuh i nei a ni mai thei a, mahse, chu chu a sim hleithei lo pawh a ni mah na. Hetiang hunah chuan i duh anga awmtir tuma i beih chiam a, i duh ang a nih theih si loh khan thinurna leh inhauhna, boruak tha lo a awm phah duh hle a ni. Chuvangin, thil thenkhat, kan duh ang ni thei ngang lo te hi chu a nih ang ang a en liam mai theih hun neih hi nupa hlimna atan a pawimawh hle a ni.
5. Nupaa nuih dun fo hi a pawimawh khawp mai. Nupaa insawisak a, infiam a, an tana hrehawm lo tur si a fiamthu thawh nana inhman theih te hi nupa hlimna thuruk pakhat a ni. Nupa infiam bawrh bawrh thei te chuan an inkarah harsatna pawh an nei tlem zawk nge nge thin. Chutih rualin in-nuihzat emaw innuihsawh emaw lam rawngkai erawh tih hauh loh tur a ni. Nupaa nuih dun theih a pawimawh rualin, innuihzat erawh a dang daih a ni. A tihfuh loh leh hriat lohna te, tihsual te atana zahthlak tur zawnga intih hauh loh tur a ni.
6. Inrintawnna hi nupa nun tihnghehna leh nupa nun hlimna atana pawimawh ber pawl a ni. Nupa karah inrintawnna tak tak a awm loh chuan boruak a fuh tak tak thei lo. A tu emaw zawkin a kawppui chu a rinngam tak tak loh a, rinhlelhna a neih tlat reng chuan an pahnih inkarah boruak tha lo a awm thuai ang. Inrintawnna hi thil engkimah a pawimawh a, nupa nun mai piahlamah sum chungchang thlengin inrintawnna hi a pawimawh takzet a ni. Kan kawppui te lakah eng emaw ngaihthat lohna kan neih chuan a rei hmain tha taka sawipui mai tur a ni a, inrinhlelhna mit nena kan inmelh ruk reng chuan boruak chhe lehzuala luh a awl thin.