Nyck thlaka F1-a kirleh Ricciardo

Nyck thlaka F1-a kirleh Ricciardo
Australian racing driver hriat hlawh thin Daniel Riccardo chuan Formula One lama kirleh turin Alpha Tauri a zawm a, he team-ah hian Nyck de Vries thlakin season la bang zawngah Red Bull sister team tan F1 inelna a hmachhawn ang.
Kum 34 mi ni ve tawh Australian driver hi nikum khan McLaren chuan an chhuah a, rinloh taka a kirleh hnuah July ni 23 khian Hungarian Grand Prix-ah bul a tan leh dawn a ni.
Race 10 an tlan hnua Alpha Tauri-in an thlauhthlak tak Dutch rookie Nyck de Vries hmunruak luah tura sengluh niin, a career-ah Ricciardo hian grand prix hnehna tum riat a chang ve tawh a, tun season tir khan Red Bull-ah reserve driver ni turin kirleh mah se race a hmachhawn lo a, Red Bull sister team lamah driver seat a luah zui ta zawk dawn a nih hi.
Kum 28 mi De Vries khan season kal laia grand prix a hmachhawnah point khat em pawh a hlawhchhuah zawh loh bakah a chetsual fo avang leh a team-mate naupang zawk Yuki Tsunoda nen khaikhina mit a tlun loh zawk avangin petchhuah a tawk a, Ricciardo lakah team-in rinna an nghat ta phawt a ni.
Tun Thawhlehni khan Ricciardo hian Silverstone-ah Red Bulla tan tyre test a nei a, a hma nihnih liamta mai khan De Vries chu British Grand Prix-ah a hnuhnungber luahtu niin, Alpha Tauri-in an ban zui ta a ni.
Red Bull chhungkuaa a kirleh chu phurawm a tih thu Ricciardo hian a sawichhuah rualin Alpha Tauri team principal Franz Tost pawhin, “Kan team-a Daniel-a kan hruailut leh thei hian min tihlim hle a; a driving skill-ah hian rinhlelh leh hlauhthawn kan nei lo a, kan zinga mite hi a hmelhriat thum tawh a, chu thawhhona nghetsa chuan a tan pawh hma-lam pan a tiawlsam dawn a, Formula 1 grand prix-a vawiriat lai hnehna chang tawh a nih avangin team pawhin a tawnhriat kan hlawhkpui hle dawn tih a chiang a ni,” a tichhuak ve bawk.
Tost hian Scuderia Alpha Tauri tana intlansiak a hma-chhawn laia a team tana a hnathawh hlu tak avang khan an petchhuah tak Nyck chungah lawmthu a sawi nghal.
Motorsport category sang bera Ricciardo career kal mar tha lai chu an mit tlung zo tawk loa an ngaih avangin McLaren-in hma takah an tihtawpsak kha a ni a, a hmunruakah a chipui Oscar Piastri an senglut.
A hnuah Australian hian a team hlui Red Bull a zawm leh a, he team behchhan hian kum 2014 leh 2017 inkar khan grands prix hnehna tum sarih a lo chang tawh a, mahse, season liamta tawpa an sengluh tum kha chuan third driver atan chiah inremna an ziahpui a, tunah season chanve pawh tling tawh loah full-time race seat a luah leh dawn ta a ni.