Lok Sabha inthlanpuia Mizoram vil tura general observer atana ruat Dr Nipun Vinayak chuan inthlan kaihhnawiha mawhphurtu hrang hrang chelhtu – nodal officer, police official leh Core Election Team member te a thutkhawmpui.
District election officer Ramdinliani chuan powerpoint presentation hmangin Lunglei district-in boruak muanawm tak hnuaia Lok Sabha inthlan felfai leh thianghlim tak neih theih nana an inpuahchahna entirin, a sawifiah nghal a ni.
General observer chuan Lunglei district inpuahchahna chu lungawithlak a tih thu sawiin, inthlan zawh hma chuan tha thlah loa tang mar pat turin official-te a chah. District-ah Lok Sabha inthlanpui felfai leh thianghlim tak, boruak muanawm tak hnuaiah a awm ngei a beisei tih sawiin, chumi atan chuan mawhphurhna hrang hrang kengkawhtu official-te chu duhsakna a hlan a ni.
Lunglei district-ah hian Assembly segment 6 awmin, polling station 176 a awm a, chu’ng zinga 24 chu hmeichhe hlangin an vil dawn a ni. Model polling station 6 a awm a, polling station 109 atangin web casting tih tum a ni.
Lunglei district-ah voters 100700 (mipa 49904 & hmeichhia 50796) awm mekin, PwD voters 337, kum 85 chin chunglam 404, service voters 554 an awm bawk. Voters 500 aia tlemna polling station 79 a awm a, chu’ng ho chu polling official 3 chauhin an vil dawn a ni. Polling station hla zual 13 awmin, a hla ber hi Marpara PS (Lunglei atangin km.121) a ni. Polling station hla zual 13-a duty tur polling official-te chuan vote thlak hma ni hnih April 17-ah polling station panin an chhuak dawn a ni.
Observer-in Lunglei inbuatsaihna enpui
Get real time updates directly on you device, subscribe now.