October 30 atangin Aizawl kawngpui thawmtha dawn – PWD minister

October 30 atangin Aizawl
kawngpui thawmtha dawn
– PWD minister
Kumin October 30 atangin PWD-in Aizawl khawpui kawng siamthat hna an tan dawn a, Aizawl leh Lunglei inkar kawng pawh hma an la zui nghal dawn tih PWD minister Vanlalhlana chuan a sawi.
Thawhtannia ZPM office-a inkhawmah PWD minister hian, hun rei tak Aizawl khawpui kawng major repair ni tawh lo chu tha takin an siam dawn a, tuna Bawngkawn kawng tha taka an siam ang hian siam vek an tum tih a sawi. Lungverh leh Lengpuiah Hot Mox Plant an bun a, kawngpui pawimawh laia hman tur phei chu Silchar lung tha lakluh an tum tih sawiin, bituminous concrete a ni dawn a, Aizawl to Lunglei road pawh an thawk zui dawn tih a sawi a ni.
Mizoramah state PWD, BRO leh NHIDCL enkawl kawngpui a awm a. Vairengte atanga Sairang inkar kawng chu NHIDCL enkawl ni mah se, Kolasib leh Kawnpui inkar leh Khamrang leh Sairang inkar kawng chu state sawrkarin contractor ruaia hna a thawh mek lai a nih avangin kawng siam hna an kalpui reng tho a. Laih zawh a nih hnuah NHIDCL-in a enkawl zui mai si loa, enkawltu nei lo ang maiin a awm hman a; furpui a lo thleng a, kawng a chhe chho zel a, harsatna kan tawk ta tih Vanlalhlana hian a sawi.
Sawrkarin a ngaipawimawh a, tun thlengin a ngaihsakin an la buaipui reng a, Mizoramah duh khawp chak hmuh tur a awm mang loa, labour tur thlengin mamawh leh duh khawp hmuh tur an vang hle tih a sawi.
“Heng zawng zawngah hian mawhphurtu chu kan ni a, mawh kan phurh dan erawh ka sawi tak angin, a zavai chuan a ni lo. Kawng tha siam turin khaw tha kan mamawh a, hei hi kan harsatna leh buaina lian ber niin, thal hun kan thleng chho anga, kan kawng pawh a tha chho tawh turah ka ngai,” a ti.
Kawnpui leh Khamrang inkar leh Khamrang leh Sairang inkar kawng siamna atan cheng nuai 137.87 an seng tawh a, tunah hian nuai 100 an dil belh leh mek a, siamtha vek tur chuan nuai 500 mamawhin an inhria tih minister hian a sawi a ni.