ODF Plus turin endik mek

Khawzawl district-a khaw 25 chu pawnlera inthiar awm lohna leh thianghlimna lama hmasawn – ODF Plus Model Village-a puan turin endikna mek a ni.
Tunah hian Mizoramah Mamit district chiah ODF Plus Model Village-a puan ala awm a. Khawzawl PHE EE Liantluanga Chohte chuan an district-a thingtlang khaw 25 chu ODF Plus Model Village ni tura tehfung hrang hrang awmte an tlin vek tawh tih a sawi. Tunah hian enfiah hna thawh mek a ni a, tun thla chhunga zawhfel tum niina, an zawh hunah chuan Khawzawl district chu ODF Plus Model Village-a puan nghal theih beisei a ni tih a sawi.
Khawzawl district hi pawnlera inthiar awm lohna – ODF a ni tawh a. ODF Plus-ah chuan bawlhhlawh tawih thei leh tawih thei lo thliarhran, Plastic Waste Collection Centre neih, Community Soak Pit leh Composed Pit neih bakah tehfung dang engemawzat a awm a. ODF Plus hi tehfung hrang hrang an neih dan azirin aspiring, rising leh model-ah then hran an ni. Khawzawl district-a khaw 25-ah hian Swachh Bharat Mission (Gramin) leh 15th Finance Commission sum hmangin ODF Plus ni tura tul leh pawimawh chu siam vek a ni tawh.