Office kalphung leh IFMIS inhrilh

Office kalphung leh IFMIS inhrilh
Ni hnih awh tur Rural Development department buatsaih ‘Sensitization Training on Government Accounting and Office Procedure’ chu Nilaini khan minister Lalruatkima’n a hawng.
Office kalphung leh IFMIS (Integrated Financial Management and Information System) chungchang training buatsaih a ni chu lawmawm a tih thu minister hian a sawi a. Sawrkar hnathawk hlawh leh bill zawng zawng IFMIS kaltlanga pekchhuah a nih tawh avangin training hi a pawimawh hle tih a sawi.
Khawvel changkang leh hmsawn zelah thiamna a sang chho zel a, computer hmanga engkim tih a nih tawh avangin thawktute pawh inzirthar a, intahhriam reng a ngai tih sawiin, a bikin RD department chu sum chevel a tam a, tihsual palh laka inven leh chak zawka hma lakna’n sawrkarin IFMIS a chhawpchhuak chu a tangkai lehzual dawn a. Office kalhmang leh dan hriatchian loh chuan chetsual palh a awl avangin training hian rah tha a chhuah ngei a beisei tih a sawi a ni.
State RD department thawktute chu hrileng karah ramchhunga ni 100 inhlawhna titha ber pawl an nih thu te, Management Information System felfai tak an enkawl thu leh project hrang hranga an hlawhtlinnate chu an thawhrim vang a ni, tih a sawi bawk.