Oil palm leh tung thar tam tumin tan kan la – PC Vanlalruata

Eirawngbawlna atana hman tela intodelh tuma sawrkar laipuiin tan a lak meknaah Mizoram sawrkar chuan oil palm leh tung thar tam tumin tan a la ve mek tih Agriculture & Farmers’ Welfare minister PC Vanlalruata chuan a sawi.
Mizoram Urban Cooperative (MUCO) Bank Ltd. inkhawmpuilian vawi 32-na Ningania Aizawla neih hmanpuitu Cooperation minister ni bawk PC Vanlalruata chuan, sawrkarin kuthnathawktute ngaipawimawh zawngin tan a la zel a, kuminah pawh sawhthing leina atan cheng nuai tam tak thingtlang lamah an pe chhuak tih a sawi. Kuthnathawktuten an sum dahthatna atan bank an mamawh zel bawk, tiin, chu’ng atan chuan MUCO Bank Ltd. in chanvo pawimawh tak an chelh a, hun lokal zel turah pawh Mizoramin hma a sawnna atan mawhphurhna an nei tih a sawi a ni.
Sawrkarin Kolasib, Mamit, Lunglei leh Lawngtlai district-ah Oil Palm Link Road thuamchakna atan PWD kaltlangin cheng vaibelchhe 25.97 tender a chhuah tawh a, sawrkar laipui scheme, National Mission on Edible Oils – Oil Palm (NMEO-OP) zulzuia oil palm chingtute tan an lakpui zel tih a sawi. India ram state dang lakah Mizoram chuan tung tam tham zawk leh hlawk zawk tharchhuahna tur hmunhma remchang bik a nei a. Hei hi hmang tangkaiin state sawrkar chuan National Mission on Edible Oil – Oil Seeds /tree Borne Oilseeds Scheme hnuaiah tung chin a ngaipawimawh tih a sawi bawk.
MUCO Bank-in loan cheng nuai 3948.77 a pe thei tawh chu hma an sawnzia tilangtu a ni, tiin, kumin February-a Bawngkawn Branch thar an hawng theite chu a lawmpui tih a sawi bawk.
MUCO Bank Ltd. hi 1988 August 11-a din a ni a, tunah hian deposit cheng nuai 8150.75 awm tawhin, loan nuai 3948.77 pek a ni tawh a, loan chhia (NPA loan) cheng nuai 218.95 an nei a. Shareholder mi 5664 awmin share cheng nuai 543.56 an nei mek.