Oil palm oil herna bun

Mamit district Tuidam khuaah District Cooperation office huaihawtin Thawhlehni khan MJA Mamit District leh District Information & Public Relations department chuan Tuidam Oil Palm Farmer Cooperative Society Ltd. tana oil palm cooking oil herna khawl trial run neih chu a hmunah an enpui.
District Cooperative officer Lalthangfala sawi danin, oil palm herna khawl hian ni khatah oil palm quintal 10 a her thei a, ni khatah oil palm hriak litre 200 leh oil palm cake kg. 300 a her chhuak thei dawn a ni. He khawl bun nan leh a in sakna hian nuai 22.50 sen a ni a. Khawl hi hman a nih hunah chuan oil palm chingtuten tuna oil palm an hralhna aia a let thuma hlawkin an oil palm an hralh thei tawh dawn a ni. Mamit district-a a hmasa ber tur a ni bawk.
Tunah Mamit district-ah cooperative society 115 an awm mek a; hmalakna hrang hrang kalpui niin, chhungkaw tam takin chhungkaw eibel bera hmang an awm tawh a ni.