Raltlan chhinchhiah chhung pawtsei

Myanmar tualchhung buaina avanga Mizorama raltlan awm mekte biometric hmanga chhinchhiah hna kalpui hun chhung chu sawrkar laipuiin kumin December thleng hun a pawtsei.
Home department hotute sawi danin, Mizorama sahimna zawnga Myanmar atanga raltlante biometric hmanga chhinchhiahna tur hian sawrkar laipui Minstry of Home Affairs thu nghah mek a ni a. Hemi hmaa an thu hriat chin chu, Ministry of Home Affairs (MHA) in biometric enrolment portal a siam chu ramdangmi India rama rawn lut, an rama thawn let turte tana duan a nih avangin siamthat a ngai tih an thlen a, siamthat rawtna an thawn chu ministry lam hian a la rawn chhang lo a ni.
Chief minister Lalduhoma chuan Union Home minister Amit Shah hnenah portal dang siamsak turin a lo ngen tawh a. Ngenna tihhlawhtlin tumna a la awm lo.
Myanmar raltlante chu an rama muanna tluantling a awm hma chuan thawn kir an nih loh tur thu erawh Union Home minister hian a lo tiam tawh a. Chuti chungin, thawnkir turte puala biometric enrolment portal an rawn duan leh si avangin siamtha tura an ngenna chu Mizoram sawrkarin a nghak mek a ni.
Kumin June 18-a council of ministers thukhawm chuan, sawrkar laipuiin Myanmar raltlante biometric hmanga chhinchhiah tura thuthar a neih leh chuan kalpui nghal mai nise, tiin a lo rel tawh a ni.
Myanmar raltlan an tam lai khan Mizoram sawrkar chuan mimal tin chanchin (biographic data) a lo la tawh a, hetihlai hian mi 35011 chhinchhiah an ni. Heng zing atang hian mi 28635 hnenah identity card pek an lo ni tawh. Tunah hian Myanmar raltlan 33823 an awm mek nia chhinchhiah a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More