Olivia Rodrigo ‘Drop Dead’ a lar ber
Olivia Rodrigo hla thar ‘Drop Dead’ chu khawvel huapa kar khat chhunga hla lar ber niin, Billboard Global 200 chart No.1-ah a debut a, he chart-a No.1 ni thei hla pali a neihna a ni ta. Hetihrual Justin Bieber pawhin chart top 10-ah hla pathum a rawn nei thar ve leh bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga kar khat chhunga official-only stream (subscription leh ad-supported audio leh video music services) leh download sales te chu tehna pawimawh a ni.
Drop Dead hian kar khat chhungin stream maktaduai 67.7 leh sales 41,000 a nei thei a, hei hi chart No.1-ah a debut pui ta a ni. Chart No.1-a debut tih chuan chart ranking-a a lan theihna hmasa bera No.1 ni nghal tihna a ni. He hla hi a album pathumna tur ‘You Seem Pretty Sad for a Girl So in Love’ atanga a lead single niin, a album thar hi June ni 12-a tlangzarh tur a ni.
‘Drop Dead’ hi he chart-a a hla No.1 kai thei palina niin, a hla No.1 kai hmasa ber chu ‘Drivers License’ niin, January-March 2021 chhungin kar riat a No.1 thei a, a hla dang ‘Good 4 U’ chu May-July 2021 chhungin kar ruk a No.1 thei a, July 2023-ah ‘Vampire’ kar hnih a No.1 pui tawh bawk.
Justin Bieber pawh Coachella Valley Music and Arts Festival, Indio, California-ah April ni 11 leh April ni 18-ah te a perform a, he festival-a a performance avangin a hla te a lar thar leh hle a, Nicki Minaj nena an zaidunna ‘Beauty and a Beat’ chuan stream maktaduai 80.4 neiin (82%-in a stream a pung), sales 5,000 (33%-in a pung) a nei bawk a, hei hi chart No.4 atangin No.2 a kaipui leh ta a ni. He hla hi 2012-a a tihchhuah tawh kha niin, a vanglaiin Billboard Hot 100-ah No.6 a kai thei a ni.
Bieber hla dang ‘Daisies’ chuan stream maktaduai 45.5 (60%-in a pung) neiin, sales 5,000 (69%-in a pung)a tling a, hei hi chart-ah No.16 atangin No.5-ah a invawrh pui leh ta a. He hla hi 2025-a a tlangzarh ‘Swag’ album a hla niin, nikum July thla khan Global 200 chart-ah hian No.3 a lo kai tawh bawk a ni.
Bieber-a hla lar hmasa leh rimawi khawvelin a hmelhriat tanna ‘Baby’ chuan stream maktaduai 39.1 (42%-in a pung) leh sales 2,000 (12%-in a pung) neiin, No.26 atangin No.8-ah a invawrh a, Bieber hla he chart top 10-a lang thei 10-na a ni. Billboard Global 200 chart hi 2020 September atanga an tih tan chauh a ni.
BTS ‘Swim’ chu kar li chhung a No.1 hnuah, No.1 atangin No.3-ah a tawlh ta a, Tame Impala leh JENNIE ‘Dracula’ chu No.2 atangin No.4-ah a tawlh ve ta bawk.
Billboard Global 200
Top 10:
1 Drop Dead – Olivia Rodrigo
2 Beauty And A Beat – Justin Bieber Featuring Nicki Minaj
3 Swim – BTS
4 Dracula – Tame Impala & JENNIE
5 Daisies – Justin Bieber
6 Babydoll – Dominic Fike
7 Choosin’ Texas – Ella Langley
8 Baby – Justin Bieber Featuring Ludacris
9 Man I Need – Olivia Dean
10 Ordinary – Alex Warren