Olivia Rodrigo hla thar ‘Vampire’ chu Billboard Hot 100 (singles) chart-ah a No.1 a, he chart-a a hla No.1 kai thei pathumna a ni a, a hla hmasa ‘Drivers License’ leh ‘Good 4 U’ te chu 2021 khan a lo No.1 tawh bawk a ni. Olivia Rodrigo hian a hla dang ‘Deja Vu’ (No.3) leh ‘Traitor’ (No.9) te chu top 10-ah a lo lanpui tawh bawk a, tihian chart top 10-a lang thei hla panga a nei tling ta bawk a ni.
‘Drivers License’ hi a album pakhatna ‘Sour’ atanga a lead single a ni a, ‘Vampire’ hi a album pahnihna September ni 8-a a tlangzarh tur atanga a lead single a ni bawk a, heti hian chart record siamin, zaithiam zingah album hmasa pahnih atanga lead single Hot 100 chart-a No.1 pui ve ve thei hmasa ber a ni. Olivia Rodrigo hi February ni 20, 2003 a piang niin, ani hi zaithiam 2000 hnulama piang zingah Hot 100 chart-a No.1 kai thei hla pakhat aia tem nei thei awm chhun a la ni bawk.
Billboard Hot 100 chart hi kar khat chhunga US-a zaithiam te hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Rodrigo ‘Vampire’ hian stream maktaduai 35.5 leh sales 26,000 a tling thei a, radio airplay-ah pawh ngaithlatu maktaduai 26.3 a nei thei a, hei hi chart-ah a No.1 pui ta a ni.
Morgan Wallen hla hit, chart-a kar 13 No.1 tawh, ‘Last Night’ chu stream maktaduai 29.8, sales 8,000 leh radio airplay-a ngaithlatu maktaduai 74.5 neiin No.2-ah a tawlh ta a, Luke Combs-a’n Tracy Chapman hla hlui a cover ‘Fast Car’ chu No.2 atangin No.3-ah a tawlh a, Rema leh Selena Gomez ‘Calm Down’ chu No.3 atangin No.4-ah a tawlh a, chart No.1 hlui Miley Cyrus ‘Flowers’ chu No.4 atangin No.5-ah a tawlh a, Lil Durk ‘All My Life’ featuring J.Cole pawh No.5 atangin No.6-ah a tawlh ta bawk.
Taylor Swift ‘Cruel Summer’ chu radio airplay-ah ngaithlatu maktaduai 30.3, stream maktaduai 14.9 leh sales 3,000 tlingin No.13 atangin No.7-ah a invawrh a, he hla hi 2019-a a album ‘Lover’ ami niin, tunah hian a single angin a tichhuak thar leh a, Eras Tour a neih mek concert a perform thar leh a, chu chuan a hla hia tilar thar leh ta a ni. ‘Cruel Summer’ hi Swift hla he chart-a top 10 kai thei 41-na a ni a, hmeichhe zaithiam zingah he chart-a top 10 kai thei hla ngah ber niin, a nawlpuiah chuan pahnihna a ni a, top 10 kai thei hla 68 nei Drake chiah a pha lo.
Gunna ‘Fukumean’ chu No.12 atangin No.8-ah a invawrh a, chart top 10-a lang thei hla pali a neihna a ni. Taylor Swift hla dang ‘Karma’ featuring Ice Spice chu No.8 atangin No.9-ah a tawlh a, Toosii ‘Favorite Song’ chu No.6 atangin No.10-ah a tawlh ta bawk.
Olivia Rodrigo ‘Vampire’ a Hot ber
Get real time updates directly on you device, subscribe now.