Olympic-a inlan lo tur Jabeur leh Sabalenka

Kumin French Open quarter-final paltlang zo lo ve ve world number 10 Ons Jabeur leh Aryna Sabalenka-te chuan an taksa hriselna ngaihpawimawh vangin kan hma lawka nipui Olympic tennis competition hi an khelh loh tur thu an tichiang ve ve tawh.
World number three Sabalenka hian January thla khan Australian Open title humhim mah se tunthlaa khelh zawh tak Roland Garros last eight-ah Russian tleirawl Mirra Andreeva an hneh lo ringawt a, kha kha 2022 French Open hnu lama Belarusian kum 26 miin major semi-final a chuankai zawh loh vawikhatna a ni nghe nghe.
Tunhnai kum hnih chhungin Tunisian Jabeur hi khup hliamin a tibuai chho ve reng a, hei vang hian Olympic-a ram aiawh lam pawh ngaihtuah theiah a inngai lo a nih hmel a, grass leh hard court lama grand slam tournament khelh leh lam a hawi na zawk niin a lang.
Kumin Games tennis competition hi July bu 27 atanga August ni 4 chhungin Roland Garros clay court-a khelh tur a ni dawn a, Olympic tennis khelh zawh atanga ni 22 a ral leh rualin US Open an tan ve leh dawn a ni.
Kum 29 mi Jabeur hian amah leh a team-in an ngaihtuah hnuah inkhelhna leilung thlak zung zung chu a khup dinhmun tan him loa an ngaih thu leh season la bang zawngah khelmual luh theih tawh loh mai hlauhna an nei tih sawiin, insiamrem tura hun mamawh deuha an inngaih avangin Paris Games-a inlan loh mai an titlu ta niin X-ah a tarlang.
Nikum US Open runner-up Sabalenka pawhin grand slam an khelh zui leh maina tur hard court atan taksa leh hriselna kawnga inpeihchhuak zan turin chawlh det a mamawh tih a sawi ve bawk a, tunhnai thla engemawti liamta chhung khan taksa lamah harsatna neuh neuh a tawh ve reng avangin a hriselna dinhmun a vengthawng lo thei lo a, inkhelh tam lutuk avangin a taksa tana him tur zawngin thutlukna a siam tih a sawi.
February 2022-a Russia-in Belarus thlawpnaa thenawm Ukraine an run avang leh tun thlenga indona a la kal zel avangin Games khel tura tling Russia leh Belarus player-te chu kumin Paris-ah hian an ram aiawhin an inlan thei dawn lo a, neutral ni chunga an tel a ngai dawn.
Hei hian Belarusian Sabalenka pawh a tiphur vak lo a ni ve thei a! Chutih laiin Russian men’s world number four Daniil Medvedev chuan neutral athlete ni chunga inlan pawh ngai dawn se Olympics hmachhawn a duh thu a lo sawi tawh a ni.
Sabalenka hian nikuma semi-final a luhna Berlin-ah Wimbledon tournament a khel leh dawn a, Wimbledon chu July ni 1-14 chhunga khelh tur a ni.