Olympic medal thar dawng leh tur Gary Hall!

Tunlai California ram kangah hian Los Angeles khawpuia a chenna in kangah Sydney leh Athens Games-a 50m freestyle gold medal a dawn kha a kang chhe vek a, International Olympic Committee president Thomas Bach chuan United States Olympic swimmer hlui Gary Hall Jr hi medal thar an hlan leh dawn tih a puang.
Pacific Palisades hmuna a chenna in chu thenawm in kang kal zelin mankai vein karhmasa khan three-time Olympian Hall hian meivapa a in chang ta chu mittui nen a thlirliam a!
A sawi danin, kangmei laka him tura a tlanchhiat lai hian a ui a kai a, a zunthlum enkawlna insulin chuh hman bawkin, a pu lem an ziah painting bakah sakhaw serh leh sang bungraw tlem a tlanchhuahpui hman a, Olympic medal erawh baklengin a tlanchhiatsan!
Kum 50 mi hian kum 1996-2004 chhunga Olympic Games vawithum atanga gold medal panga, silver pathum leh bronze pahnih a dawnte va hai leh turin a chenna hmuna a let theih tawh rih loh thu a sawi a, Los Angeles Times-in an kawmnaah, “Meialh rawn thlawk zit puat puatah khan baklenga tlanchhuah a ngai a, ka ui leh a chawl tlem ka tham lawk a, vawikhat tlanchhuahah chuan chuti zawng chu ka chuh hman a ni mai.
“Second 30 tal kha chambang thei ila chuan ka medal-te pawh ka chuh hman mai thei a, mahse, risk han lakna chi niin ka hre lo,” tiin an in kang a tlanchhuahsan dan a sawi.
Olympic hotu lawk ber Bach chuan X lamah post siam zui nghalin, Hall chu a medal dawn ang (replica medals) an pek leh tur thu a tarlang a, Los Angeles mipuite an tawrhpui thu leh nunna thapa kangthelhtute leh security force fakna a chhakchhuak nghal.
He thu buatsaih lai thleng hian hriat theih chinah LA kang avang hian mi 24-in nunna an chan tawh a, thli a la thawt reng avangin kangmei pawh a la kal zel.