Oman Hockey Carnival-ah Peniel Lalruatsangi telna team an champion

Oman Hockey Carnival-ah
Peniel Lalruatsangi telna team an champion
November ni 13-15, 2025 chhunga Hockey Oman leh United Thalessery Sports Club (UTSC) tangdun buatsaih Oman 5’s Hockey Carnival 2025 khelh zawh takah Mizo tleirawl Penial Lalruatsangi (Durtlang Venglai) khelhna ‘India Rush Mumbai club’ an champion.
Hockey Oman Arena-a Oman Hockey Carnival-ah hian ram panga – Oman, India, Egypt, UAE leh Irag atangin hockey team 47 telin, player 500 lai an fuan khawm a, India ram atangin team pakua lai an chhuak.
He hockey carnival-a tel team-te hian tournament hrang hrang – The Gulf Cup Hockey Fiesta (for men), Hockey Oman International Women’s Tournament, Oman – India School Tournament leh Master Cup Tournament-te an khel.
Peniel-i telna team India Rush Mumbai hi Hockey Oman International Women’s Tournament-ah an chhuak a; November ni 15 ( Inrinni ) khan Hostle Hoc Kochi nen final khelin, hun pangngaiah 2-2-a an in-draw hnuin penalty shootout-ah Peniel-i leh a pawlte hi 2-1-in an chak ta a ni.
Penial-i hi India Rush Mumbai team-ah hian goalkeeper niin, penalty shootout-a a chetthat em avanga an team hi champion thei an ni.
Durtlang tleirawl Peniel-i hian Durtlang Hockey Academy atanga bul tanin, kum 2022 khan Thenzawl SAI Hockey Training Centre-ah a lut a; nikum, 2024 atang khan tuna a awmna Imphal NCOE-ah hian a zir chhunzawm leh ta a ni.