Congress-in Manipur buaiah sorkar dem nawn leh
Indian National Congress chuan Manipur-a rei tak buaina awm tawhah BJP kaihhruai sorkar laipui a ngawi tlat leh a tihtawpna tur hawia hma a la lo chu an dem thu an sawi nawn leh.
Eptu party hian Ahmedabad, Gujarat-a 84th All India Congress Committee (AICC) Session neih mekah Manipur buaina chungchang hi sawiin sorkar an dem thu hi an tar lang.
Ni hnih awh ram pum huap intawh khawmah hian thupui (theme) atan ‘Nyaypath: Sankalp, Samarpan aur Sangharsh’ (Path of Justice: Resolution, Dedication, and Struggle) tih an hmang a. Tun tum hi kum 60 chuang hnua Gujarat-a AICC session an neih leh hmasak ber a ni.
Session-ah hian party president, Mallikarjun Kharge-a hovin an hruaitu lawk, Rahul Gandhi-a leh hruaitu langsar tak tak an tel a. Kum hnih dawn chi leh chi inkara buaina a awm tawhna hmarchhak state chungchang pawh an sawi ho a ni.
Gandhi-a hian buaina a chhuah hnua vawi thum tlawh tawhin harsatna tawkte chu a kawm kual tawh hlawm a. Hetih lai hian Prime Minister Narendra Modi-a erawh chu eptute nawr nasa hle mah se a la tlawh miah lo.
May, 2023 atanga buaina chhuakah hian mi 250 chuang thi an awm tawh a, mi sang tel in leh lo chhuahsana himna zawnga tlanchhia an awm a, relief camp-a awm tam tak bakah state pawnah pawh an tlanchhe hlawm a ni.
ongress-in Manipur buaiah sorkar dem nawn leh
Get real time updates directly on you device, subscribe now.